Suenter la publicaziun da la "glista da las tradiziuns vivas en Svizra" l'onn 2012 vegn ella repassada per l'emprima giada il matg 2016. Propostas pon vegnir inoltradas fin ils 31 d'avust 2016. La versiun actualisada da la glista duai vegnir publitgada l'onn 2018.

Cun la participaziun a la convenziun da la UNESCO per il mantegniment dal patrimoni cultural immaterial è la Svizra s'obligada da far in inventari dal patrimoni cultural immaterial en Svizra e d'actualisar periodicamain quel. L'element central è l'elavuraziun d'ina glista naziunala. La glista existenta è accessibla – en furma d'ina vasta documentaziun dal patrimoni cultural immaterial da la Svizra – en pled, maletg e tun sin la pagina d'internet www.lebendige-traditionen.ch. Actualmain cumpiglia ella 167 tradiziuns ch'èn vegnidas selecziunadas l'onn 2012 – sut la direcziun da l'uffizi federal da cultura – da spezialistas e spezialists, da represchentantas e represchentants dals uffizis chantunals da cultura e da la cumissiun svizra da la UNESCO tenor propostas dals chantuns. L'actualisaziun da questa glista vul dir confermar las endataziuns existentas, agiuntar novas endataziuns sco er stritgar tradiziuns che na vegnan betg pli pratitgadas.

Proceder communabel en la Svizra orientala
Per actualisar la glista en il chantun Grischun è responsabla Silvia Conzett. Ella è etnologa e collavuratura scientifica en il museum retic a Cuira. Las incumbensadas ed ils incumbensads per la cultura dals chantuns da la Svizra orientala Appenzell dador, Appenzell dadens, Glaruna, Schaffusa, Son Gagl, Turgovia e Turitg nomineschan communablamain per questa incumbensa Birgit Langenegger, etnologa e curatura al museum Appenzell.

Propostas da la Svizra orientala
Propostas per novas endataziuns da la Svizra orientala sin la glista da las tradiziuns vivas prendan encunter Silvia Conzett e Birgit Langenegger fin ils 31 d'avust 2016. Las propostas pon er vegnir inoltradas directamain sur la pagina d'internet da l'uffizi federal da cultura. En il rom da l'actualisaziun vegnan las propostas inoltradas examinadas d'ina gruppa directiva naziunala che sa cumpona da spezialistas e spezialists sco er da represchentantas e represchentants dals chantuns, da las citads e da la confederaziun.


Infurmaziuns:
Silvia Conzett, responsabla per il project per il chantun Grischun, tel. 081 257 48 30, e-mail: Silvia.Conzett@rm.gr.ch  


Gremi: uffizi da cultura
Funtauna: rg uffizi da cultura