Navigation

Inhaltsbereich

  • Erste Mitteilung
  • Neuen Beitrag einfügen
Dacurt ha la regenza visità in'unitad da la brigada d'infantaria da muntogna 12 en l'instrucziun dal cader sco er il Air Operations Center a Dübendorf. A medem temp ha ella scuntrà il schef da l'armada ed ha pudì discutar cun el davart l'ulteriur svilup da l'armada.

Sin il program da la visita da las truppas è stada ina invista da l'instrucziun pratica dal cader dal battagliun d'infantaria da muntogna 77 da la brigada grischuna d'infantaria da muntogna 12. Il brigadier Franz Nager sco er il cumandant dal battagliun Damian Casanova han mussà en il center d'instrucziun da cumbat a Walenstadt l'instrucziun dal cader per il servetsch da truppa vegnint. La regenza n'ha betg mo pudì sa persvader da la tecnica da simulaziun la pli moderna, mabain er da la motivaziun e da la cumpetenza dals militars preschents.
La regenza è s'allegrada da la preschientscha persunala dal schef da l'armada, il cumandant da corp André Blattmann, che ha accumpagnà la regenza durant l'entira visita da las truppas. Uschia èsi stà pussaivel da discutar davart l'ulteriur svilup da l'armada e davart il concept da staziunament che pertutga il chantun. La discussiun cun ils dus uffiziers superiurs dal stab, il cumandant da corp André Blattmann ed il brigadier Franz Nager, ha gì lieu en ina fitg buna atmosfera. La regenza ha profità da l'occasiun d'engraziar al schef da l'armada per la collavuraziun excellenta cun il chantun Grischun. Al brigadier Franz Nager, ch'è vegnì nominà sco nov schef da la furmaziun da scolaziun "infantaria", ha la regenza medemamain engrazià per la direcziun premurusa ed engaschada da la brigada grischuna d'infantaria da muntogna 12.
Suenter – a chaschun da la visita da la centrala d'operaziuns da l'aviatica militara sut la direcziun dal colonel dal stab general Peter Bruns – è vegnida tematisada la chapientscha per las acziuns da l'aviatica militara durant il Forum economic mundial. Plinavant han pudì vegnir discutadas pussaivladads da cooperaziun tranter l'armada d'ina vart e la polizia, la protecziun civila ed ils pumpiers da l'autra vart. Tar ina visita da la Skyguide a Dübendorf ha la regenza plinavant survegnì ina invista interessanta da ses locals d'operaziun.


Infurmaziuns:
president da la regenza Christian Rathgeb, schef dal departament da giustia, segirezza e sanadad, tel. 081 257 25 01, e-mail: Christian.Rathgeb@djsg.gr.ch  


Gremi: regenza
Funtauna: rg chanzlia chantunala dal Grischun
Neuer Artikel