Suenter in temp da construcziun dad 8 onns èsi uschenavant. Ils 30 da zercladur 2016 po vegnir avert – en il rom d'in act festiv – il sviament da Küblis a temp per il traffic.
Libra via tras il Partenz – cun l'avertura dal sviament da Küblis vegn terminada in'èra da stgars 50 onns da construcziuns da sviaments en il Partenz. Ils sviaments da Grüsch, da Schiers e da Jenaz èn vegnids construids gia ils onns 1967 fin 1984, il sviament da Landquart è suandà l'onn 1994. Sin basa d'in project general èn vegnids liberads dal traffic da transit durant ils ultims dus decennis er tut ils vitgs dal Partenz davos, e quai cun il sviament da Claustra, cun il sviament da Saas ed ussa cun l'avertura dal sviament da Küblis.
Survista dal sviament da Küblis
Il tunnel da Küblis sco traject cardinal
La lunghezza totala dal project da sviament è 3060 meters e cumenza tar la nova colliaziun da Küblis, la quala collia la rait da vias chantunala e regiunala sur in access cumplain cun la via naziunala A28. Ils vitgs da Küblis e da Dalvazza vegnan liberads dal traffic da transit grazia al tunnel da Küblis che ha ina lunghezza da 2255 meters. Il tunnel passa sut l'aual dal Schanielatobel ed ha en quest sectur in cuvriment da mo 5 meters. Sco sortida d'urgenza en cas d'in eveniment è vegnida construida parallelamain al tunnel da Küblis ina galaria da segirezza da 2015 meters lunghezza. Davant il portal ost passa il tunnel en la galaria Prada, avant che la via naziunala A28 s'auza – sur il Saaserstutz cun ina pendenza dad 8,5 pertschient – a la colliaziun parziala Saas vest. Ils custs da quest project da construcziun importan circa 210 milliuns francs.
La nova colliaziun da Küblis cun la rundella Dalvazza
Il portal ost cun la galaria Prada
Festivitads d'avertura
Il sviament da Küblis vegn surdà al traffic ils 30 da zercladur 2016 a chaschun d'ina festa d'avertura. Er la populaziun locala è cordialmain envidada d'esser da la partida a l'inauguraziun da ses sviament. Las festivitads uffizialas cumenzan a las 10.00 e vegnan a durar fin vers las 12.30. Ultra da pleds dal cusseglier guvernativ Mario Cavigelli, dal directur da l'uffizi federal da vias Jürg Röthlisberger sco er da represchentants da l'uffizi da construcziun bassa e da las vischnancas da Küblis e da Luzein han lieu er ina benedicziun ed in program accumpagnant correspundent cun preschentaziuns musicalas ed artisticas. Cun l'act tradiziunal da tagliar il bindel vegn il tunnel da Küblis surdà al traffic per in emprim viadi.
L'uffizi da construcziun bassa dal Grischun renviescha al fatg, ch'i na dat al lieu da las festivitads d'avertura tar la nova colliaziun da Küblis naginas pussaivladads da parcar per las visitadras ed ils visitaders. Er a Dalvazza ed a Küblis è limitada la purschida da plazzas da parcar. I vegn recumandà a las visitadras ed als visitaders d'arrivar cun ils meds da transport publics.
Infurmaziuns:
- cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail:
Mario.Cavigelli@bvfd.gr.ch
- Roger Stäubli, schef da la construcziun da vias, uffizi da construcziun bassa dal Grischun, tel. 081 257 38 42, e-mail:
Roger.Staeubli@tba.gr.ch
Gremi: departament da construcziun, traffic e selvicultura dal Grischun
Funtauna: rg departament da construcziun, traffic e selvicultura dal Grischun