La fundaziun tetgala d'utilitad publica dal Grischun promova projects d'utilitad publica areguard u en connex cun il chantun Grischun. Ella porscha er servetschs, per che persunas possian far facilmain donaziuns da valurs da facultad per intents d'utilitad publica. La fundaziun cumenza cun sia lavur mez da l'onn 2016.
La fundaziun tetgala d'utilitad publica dal Grischun è vegnida stabilida dal chantun. Quai sin iniziativa d'ina incumbensa parlamentara dal cussegl grond (incumbensa Pfenninger concernent la fusiun da fundaziuns; 2010/2011). La fundaziun è in'alternativa per donaturas e donaturs che vulessan evitar las stentas temporalas, administrativas e finanzialas en connex cun la constituziun e cun la gestiun d'ina fundaziun independenta. Lur ideals pon ellas ed els realisar gia a partir da 50 000 francs cun constituir in fond spezial.
Entaifer la fundaziun tetgala d'utilitad publica dal Grischun vegn er manà in fond cuminaivel. A quest fond vegnan attribuids quels meds finanzials che vegnan surdads a la fundaziun senza dedicaziun speziala ad in fond. Ultra da donaziuns van en quest fond er meds finanzials d'iertas che resultan al chantun. Plinavant vegnan transferidas al fond cuminaivel las fundaziuns dependentas che vegnan administradas dal chantun (fonds, legats e relaschs) e che disponan mo pli da paucs meds finanzials.
Cun ils meds dal fond cuminaivel vegnan promovids projects d'utilitad publica, per exempel en ils secturs cultura, sport, fatgs socials, furmaziun u sanadad. Il cussegl da fundaziun decida davart il diever dals meds. Presidià vegn quest cussegl da la cussegliera guvernativa Barbara Janom Steiner sco scheffa dal departament da finanzas e vischnancas. Sco ulteriur commember e sco ulteriuras commembras ha la regenza elegì Gion Claudio Candinas, secretari dal departament da giustia, segirezza e sanadad, Barbara Gabrielli, manadra da l'uffizi da cultura, Susanna Gadient, manadra da l'uffizi dal servetsch social, ed Andrea Stadler, secretaria dal departament d'educaziun, cultura e protecziun da l'ambient. Responsabels per manar las fatschentas operativas da la fundaziun èn Beat Ryffel e Martin Nigg.
Il cussegl da fundaziun decida en il rom dal reglament da promoziun davart las contribuziuns or dal fond cuminaivel. Dumondas pon vegnir inoltradas fin ils 30 da settember 2016 e vegnan tractadas dal cussegl da fundaziun il november 2016.
Ulteriuras infurmaziuns sa chattan sin la pagina d'internet da la fundaziun tetgala: www.dachstiftung.gr.ch
Fotografia agiuntada:
Beat Ryffel, Andrea Stadler, Martin Nigg, Barbara Janom Steiner, Barbara Gabrielli, Gion Claudio Candinas, Susanna Gadient (da sanestra)
Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas dal Grischun, tel. 081 257 32 01, e-mail Barbara.Janom@dfg.gr.ch
Gremi: departament da finanzas e vischnancas
Funtauna: rg departament da finanzas e vischnancas