Oz vegn la punt nova sur il Rain anteriur tranter Tavanasa e Danis surdada al traffic en il rom d'ina festa d'avertura. Grazia a questa punt vegn facilità l'access en la regiun da vacanzas Breil – Vuorz – Andiast. Uschia po er vegnir auzà il pais maximal permess sin la via da Breil.
La punt nova, ch'è vegnida construida entaifer 2 onns e che ha custà tut en tut var 5,3 milliuns francs, na traversa betg mo il Rain anteriur, mabain er il trassé da la Viafier retica. L'element visualmain il pli marcant da la punt nova, ch'è 101 meters lunga, èn ils dus chaus da la punt en furma da trumbetta. Quels èn stads necessaris da tuttas duas varts da la punt pervia da la geometria da la via. Cun sia ladezza da 9,5 meters sa schlargia la punt uschia fin a 36,5 meters da la vart da Tavanasa.
Sin la punt stretga da Versell da l'onn 1928 na pudevan vehichels betg cruschar ed ils transports grevs na dastgavan betg traversar la punt. Cun prender en funcziun la punt sur il Rain anteriur a Danis po il pais maximal permess sin la via da Breil vegnir auzà a 32 tonnas. La punt artgada istorica da l'inschigner da Cuira Walter Versell vegn mantegnida. Quai grazia a l'engaschament da l'uniun NOSSA PUNT e da la fundaziun cun il medem num, che surpiglia la punt istorica da Versell sco proprietad e per il mantegniment. La punt vegn a star a disposiziun en l'avegnir a peduns ed a ciclists.
Ulteriuras infurmaziuns davart la punt sur il Rain anteriur a Danis èn cuntegnidas en il
fegl d'infurmaziun da l'uffizi da construcziun bassa dal Grischun.
La punt nova sur il Rain anteriur a Danis
La punt da Versell da l'onn 1928 vegn mantegnida
Infurmaziuns:
- cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch
- inschigner chantunal Reto Knuchel, uffizi da construcziun bassa, tel. 081 257 37 01, e-mail Reto.Knuchel@tba.gr.ch
Gremi: departament da construcziun, traffic e selvicultura dal Grischun
Funtauna: rg departament da construcziun, traffic e selvicultura dal Grischun