Ina vaccinaziun cunter la grippa è la metoda la pli efficazia per sa proteger cunter ina malsogna virala contagiusa. Spezialmain il persunal da sanadad po proteger meglier las pazientas ed ils pazients, sch'el sa lascha vaccinar.
La grippa è ina malsogna virala contagiusa da la stagiun fraida. Spezialmain per umans cun ina ristga da cumplicaziuns pli gronda n'è la grippa betg ina malsogna nunprivlusa. Cumplicaziuns pon derivar dal virus sez u d'ina infecziun bacteriala supplementara. Il pli savens datti disturbis da la via respiratorica, ina inflammaziun da l'ureglia da mez u malcostas. La metoda la pli efficazia per sa proteger cunter la grippa e cunter eventualas cumplicaziuns è la vaccinaziun. Ella vegn recumandada a persunas cun ina ristga da cumplicaziuns pli gronda, sch'ellas avessan da pigliar ina grippa. Quai èn cunzunt persunas sur 65 onns.
Appel al persunal da sanadad
Las collavuraturas ed ils collavuraturs dals ospitals e da las chasas da persunas attempadas e da tgira han di per di contact cun persunas cun ina ristga da cumplicaziuns pli gronda. Sch'els sa laschan vaccinar cunter la grippa, na protegian els pia betg mo sasezs, mabain er las pazientas ed ils pazients respectivamain las abitantas ed ils abitants affidads ad els. Il president da la regenza Christian Rathgeb appellescha en quest senn a las collavuraturas ed als collavuraturs dals ospitals e da las chasas da persunas attempadas e da tgira da sa laschar vaccinar cunter la grippa.
Dar in bun exempel
Sa laschar vaccinar cunter la grippa pon er persunas che vulessan minimar – per motivs privats u professiunals – la ristga da pigliar ina grippa. Il president da la regenza Christian Rathgeb è per quest motiv er sa laschà vaccinar cunter la grippa a l'ospital chantunal dal Grischun.
Fotografia:
Infurmaziuns:
President da la regenza dr. Christian Rathgeb, schef dal departament da giustia, segirezza e sanadad, tel. 081 257 25 01, e-mail
Christian.Rathgeb@djsg.gr.ch
Gremi: departament da giustia, segirezza e sanadad
Funtauna: rg departament da giustia, segirezza e sanadad