La regenza grischuna ha nominà Thomas Schmid sco nov manader da la controlla chantunala da finanzas. El vegn a surpigliar questa funcziun il 1. da fanadur 2017.
La regenza grischuna ha elegì Thomas Schmid da Claustra-Serneus sco nov manader da la controlla da finanzas dal chantun Grischun. Thomas Schmid ha 51 onns ed è econom da manaschi SAS e revisur da quints diplomà. L'elecziun ha gì lieu sin basa da la proposta dal gremi paritetic che sa cumpona da mintgamai duas represchentantas e represchentants da la regenza e da la cumissiun da gestiun (CdG) dal cussegl grond.
Thomas Schmid arriva da l'economia privata tar l'administraziun chantunala. El è stà engaschà durant bunamain 25 onns tar ina da las grondas societads da revisiun da quints e da cussegliaziun, dapi l'onn 2001 sco partenari. Thomas Schmid ha lavurà sco revisur da quints e cussegliader en differents lieus sin l'entir mund. El ha enconuschientschas fundadas dals fatgs da rendaquint e da cussegliaziun, ha experientscha da direcziun da blers onns ed è admess da l'autoritad federala da surveglianza en chaussas da revisiun sco expert da revisiun. Actualmain abita el a Lachen ed a Cunter en il Partenz. Thomas Schmid daventa successur da Hansjürg Bollhalder che sa lascha pensiunar anticipadamain per la fin da zercladur 2017, suenter esser stà 13 onns manader da l'uffizi.
La controlla da finanzas è l'organ spezialisà suprem da la surveglianza da finanzas dal chantun Grischun. Ella è il post da revisiun intern ed extern dal chantun resp. da l'administraziun chantunala. Ella sustegna d'ina vart la cumissiun da gestiun dal cussegl grond tar la surveglianza da las finanzas prescritta da la constituziun, e da l'autra vart la regenza tar la surveglianza da las finanzas da l'entira administraziun. Tar las incumbensas principalas tutga la revisiun dal quint annual dal chantun e da las finanzas dals uffizis chantunals. Ultra da quai surveglia ella las finanzas da las dretgiras e da las autoritads da mediaziun sco er dals instituts autonoms da dretg public. Davart ils resultats da las revisiuns dat la controlla da finanzas pled e fatg en in rapport per mauns dals posts examinads, dals departaments e da la cumissiun da gestiun.
La controlla da finanzas è autonoma e professiunalmain independenta. Administrativamain è ella suttamessa al departament da finanzas e vischnancas.
Fotografia:
Thomas Schmid
Infurmaziuns:
Cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail
Barbara.Janom@dfg.gr.ch
Gremi: regenza
Funtauna: rg chanzlia chantunala dal Grischun