Il schurnalist grischun da radio Curdin Vincenz ha survegnì ier a Cuira il premi da radio e televisiun da la SRG SSR Svizra orientala. Cun Curdin Vincenz undrescha la SRG SSR Svizra orientala ina persunalitad che fa in schurnalissem pretensius, cumpetent e multifar.
Il premi da radio e televisiun da la Svizra orientala ha ina lunga tradiziun. Dotà cun 10 000 francs vegn el surdà dapi l'onn 1952 da la SRG SSR Svizra orientala quasi mintg'onn. Regalà vegn el dals chantuns Appenzell Dador, Appenzell Dadens, Glaruna, Grischun, Son Gagl e Turgovia. A la surdada dal premi a Cuira ha il cusseglier guvernativ Martin Jäger salvà il pled da bainvegni.
20 onns en il servetsch da la SRF
Naschì l'onn 1973 e creschì si a Trimmis sper Cuira è el entrà suenter la terminaziun dal studi a l'universitad da Berna en ils schurnals regiunals da la Svizra orientala e dal Grischun. L'onn 1998 ha el midà en la redacziun da novitads a Turitg. Trais onns pli tard è el turnà tar il schurnal regiunal dal Grischun, nua ch'el è stà correspundent grischun fin l'onn 2006. Suenter ha el moderà il magasin da mezdi "Rendez-vous". La fin da l'onn 2011 è el daventà correspundent da Turitg e dapi l'october da quest onn è el redactur da la chasa federala a Berna. Dapi quasi 20 onns lavura Curdin Vincenz tar il radio SRF en las funcziuns las pli differentas.
Vuschs davart la surdada dal premi
"Curdin Vincenz è perdert, sa bler, sa analisar, ma oravant tut sa el declerar ils eveniments en moda originala e cun ligerezza uschia che jau pover laic al chapesch er", l'ha ses collega dal radio Roland Wermelinger ludà a la festa. "Curdin Vincenz applitgescha virtuusamain tut las furmas radiofonicas dal schurnalissem", ha la presidenta da la giuria Hildegard Jutz motivà la surdada dal premi ad el. Cun Curdin Vincenz undreschia la SRG SSR Svizra orientala ina persunalitad che fetschia in schurnalissem pretensius, cumpetent e multifar. "Che la giuria m'attestescha tut quests attributs, ma fa schont in zic superbi", ha declerà l'undrà. El chapeschia quest premi sco renconuschientscha e sco segn ch'el haja fatg ina impressiun restanta tar l'in u l'auter cun sia lavur en las differentas funcziuns tar radio SRF.
Fotografia agiuntada:
Il schurnalist grischun da radio Curdin Vincenz ha survegnì ier a Cuira il premi da radio e televisiun da la SRG SSR Svizra orientala.
Infurmaziuns:
Hildegard Jutz, manadra da la cumissiun da program e commembra da la suprastanza da la SRG SSR Svizra orientala, tel. 058 229 32 64
Gremi: cumissiun da program da la SRG SSR Svizra orientala
Funtauna: rg cumissiun da program da la SRG SSR Svizra orientala