Zum Seiteninhalt

La digitalisaziun mida ils models da fatschenta en il turissem

  • Erste Mitteilung
  • Neuen Beitrag einfügen
La digitalisaziun svelta e globala mida fermamain ils models da fatschenta – er en il turissem. Expertas ed experts da renum han discutà al Forum economic mundial 2017 (WEF) cun var 80 interprendidras ed interprendiders turistics svizzers. Il sguard interessant en l'avegnir è vegnì organisà dal departament d'economia publica e fatgs socials (DES) en collavuraziun cun il cussegl turistic dal Grischun ed en cooperaziun cun il WEF.

Gia per la segunda giada ha gì lieu ier, a l'ur dal Forum economic mundial, in dialog turistic captivant. Quest onn davart il tema "Digitalisaziun en il turissem – midada dals process da fatschenta". Davant retschas emplenidas han manageras e managers suprems d'interpresas ch'èn activas sin l'entir mund, discutà davart las midadas sveltas e profundas en tut ils secturs da fatschenta. Da la runda d'expertas ed experts prominents han fatg part Aireen Omar (CEO dad AirAsia Malaysia), Gloria Fluxa Thienemann (CEO da la gruppa Iberostar), Richard Solomons (CEO da la InterContinental Hotels Group), Gordon Wilson (CEO da Travelport International) sco era Jon Cook (CEO da l'agentura internaziunala da reclama VML Inc.). Sut la moderaziun da prof. dr. Ernst A. Brugger, president dal cussegl turistic dal Grischun, han ellas ed els procurà per invistas en las midadas sveltas dal martgà e dà ferms impuls da reflexiun per novs models da fatschenta. Pussibilità l'occurrenza ha il directur dal WEF Alois Zwinggi, ch'è er commember dal cussegl turistic dal Grischun.

-

Digitalisaziun en il turissem
Tge basegns ha la clientella en l'avegnir? Co sa midan las disas da viagiar tras la digitalisaziun? La digitalisaziun engrondescha la schelta per la clientella, ma tras la registraziun da datas da la clientella pon las interpresas optimar lur servetschs sur l'entir viadi da la clientella. Pli e pli impurtantas cumpareglià cun la reservaziun tradiziunala da singuls elements (p.ex. sgol, transfer ed hotel) daventan aventuras da viadi integradas cumplettamain e persunalisadas. Transfurmaziuns digitalas vegnan a midar fundamentalmain e sistematicamain il sistem turistic tradiziunal che nus enconuschain oz. Il cumportament dal giast ed il svilup social pretendan d'agir e da reagir pli e pli svelt. Ils models da fatschenta actuals ston vegnir reponderads fundamentalmain. La rolla da las destinaziuns sto vegnir definida da nov: purschidas profiladas e coordinadas sin spazis pli gronds daventan svelt pli impurtantas.

Per finir ha la runda da discussiun cun las var 80 interprendidras ed interprendiders sco er persunas da cader dal Grischun e da la Svizra purtà ideas e concepts per projects concrets. L'engaschament per in'approfundaziun sistematica e per ina concretisaziun dals novs concepts strategics è stà da sentir bain.

En collavuraziun cun la scola auta da tecnica ed economia Cuira vegn elavurada ina resumaziun cun enconuschientschas per l'industria da turissem en Svizra resp. en il Grischun. Persunas interessadas pon empustar la resumaziun tar l'uffizi per economia e turissem (tel. 081 257 23 42, e-mail info@awt.gr.ch).


Infurmaziuns:
- Cusseglier guvernativ dr. Jon Domenic Parolini, schef dal departament d'economia publica e fatgs socials, tel. 081 257 23 01, e-mail Jondomenic.Parolini@dvs.gr
- Prof. dr. Ernst A. Brugger, president dal cussegl turistic dal Grischun, tel. 044 299 95 95, e-mail Ernst.Brugger@bruggerconsulting.ch


Gremi: departament d'economia publica e fatgs socials
Funtauna: rg departament d'economia publica e fatgs socials
Neuer Artikel