Navigation

Inhaltsbereich

  • Erste Mitteilung
  • Neuen Beitrag einfügen
Da 2013 fin 2016 – en il rom dal program da la regenza – èn parts impurtantas dals archivs e da las collecziuns vegnidas registradas digitalmain en la biblioteca chantunala dal Grischun, en il museum retic ed en il museum da la natira dal Grischun e rendidas accessiblas sin la pagina d'internet av-medienportal.gr.ch ad ina vasta publicitad.

Il Grischun posseda ina diversitad culturala unica. La promoziun e l'intermediaziun da questas valurs è – ultra da sia impurtanza sco factur d'identitad per la populaziun indigena – in potenzial impurtant en ils secturs da la furmaziun e dal turissem. En l'uffizi da cultura dal Grischun exista ina gronda schelta da bains culturals ch'eran fin ussa mo per part registrads digitalmain ed uschia accessibels ad in vast public.
La finamira dal punct central da svilup "Diversitad culturala e linguistica" era quella da promover la documentaziun dals bains culturals sco basa per utilisar e per chapir la diversitad culturala en il Grischun. Per quest intent han la biblioteca chantunala dal Grischun, il museum retic sco er il museum da la natira dal Grischun cataloghisà digitalmain las parts impurtantas da lur archivs e da lur collecziuns. En la biblioteca chantunala èn vegnids registrads en ina banca da datas centrala e rendids accessibels en in catalog online films e portatuns istoricamain impurtants da e davart il Grischun. Ultra da quai è in register da cudeschs, da medias e d'auturas ed auturs ch'existiva fin ussa sco tezlera, vegnì recataloghisà e transferì en ina banca da datas electronica. Oz èn registradas tut las medias da la biblioteca chantunala dal Grischun en in catalog online che stat a disposiziun a las utilisadras ed als utilisaders. Il museum retic ed il museum da la natira dal Grischun possedan inventaris voluminus da bains culturals e natirals impurtants, ch'èn perditgas ed exponents da la memoria istorica davart ils svilups da nossa societad e da noss ambient, e che gidan considerablamain a cuntanscher ina purschida variada e viva e pia ad augmentar l'attractivitad dal chantun per persunas indigenas e per giasts. En il rom dal punct central da svilup han tuts dus museums pudì registrar electronicamain las parts impurtantas da lur collecziuns. Las infurmaziuns pon da nov vegnir consultadas da terzas persunas en ils catalogs online e stattan pia a disposiziun per la documentaziun e per la perscrutaziun.
Tut en tut existan ussa en ils dus museums passa 25 000 unitads da datas electronicas davart ils objects da las collecziuns. En la biblioteca chantunala èn vegnids digitalisads 6500 films, videos e documents da tun e passa 360 000 indicaziuns da catalog. Questas datas permettan da nov da s'infurmar e da communitgar en moda cumplessiva davart ils bains culturals impurtants da las trais instituziuns da l'uffizi da cultura, e quai cun agid dals catalogs online.

Portal digital da medias: av-medienportal.gr.ch

agiunta biblioteca chantunala dal Grischun
agiunta museum da la natira dal Grischun
agiunta museum retic


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail Martin.Jaeger@ekud.gr.ch  
- Barbara Gabrielli, manadra da l'uffizi da cultura, tel. 081 257 48 01, e-mail Barbara.Gabrielli@afk.gr.ch  


Gremi: uffizi da cultura
Funtauna: rg uffizi da cultura
Neuer Artikel