Zum Seiteninhalt

Communicaziun da la regenza dals 20 d'avrigl 2017

  • Erste Mitteilung
  • Neuen Beitrag einfügen
La regenza ha approvà in project da via a l'entrada dad Avras ed in project per la correcziun dal curs d'aua a Puschlav.

Correcziun da la via d'Avras per sviar il traffic

La regenza ha approvà il project d'exposiziun per curreger la via d'Avras, traject da la chavorgia da la Roffla fin a l'access Avras, cun intginas cundiziuns e permissiuns spezialas.
En il rom d'in project da mantegniment da l'uffizi federal da vias (UVIAS) vegn renovà tut il vial da la via naziunala N13 tranter Avras-Balamburtg-Ziràn e vegnan reparadas tut las construcziuns artifizialas. La part centrala da quest project è la sanaziun dal tunnel da Balamburtg. Durant l'execuziun da questas lavurs da sanaziun sin la via naziunala sto il traffic vegnir manà sur las vias chantunalas (via taliana e via d'Avras).
Tuttas duas vias chantunalas han però trajects che han dimensiuns memia pitschnas per quest project. Per quest motiv ston ils trajects pertutgads vegnir adattads ordavant per servir a quest sviament da traffic. Il project d'exposiziun approvà cuntegna il schlargiament da la via d'Avras a la ladezza normada da 5,8 meters sin ina lunghezza da var 660 meters. Il medem mument vegnan renovadas sia surstructura e differentas construcziuns artifizialas e curregida la geometria da la via.

-

Novas ovras da protecziun per il torrent a Puschlav

La regenza ha approvà in project per construir rempars per il torrent Val Beton a Puschlav cun intginas cundiziuns e permissiuns. Tras la Val Beton curra in torrent che po chaschunar bovas e che furma – ensemen cun l'aual lateral da la Val la Presa – in cugn alluvial enorm en il fund da la val. Da vegl ennà smanatscha quest sistem d'auals il territori d'abitadi dal vitg da San Carlo cur ch'i dat auas grondas.
En il rom d'ina inspecziun da rutina da las ovras da protecziun existentas èsi sa mussà ch'ina part dals rempars da torrent è donnegiada. In'analisa da las ristgas ha plinavant mussà ch'ils rempars da l'aual ston vegnir rinforzads e cumplettads en differents lieus per ademplir las pretensiuns odiernas a la segirezza. En il rom d'in project da dustanza vegnan ussa reparads ils rempars da torrent donnegiads e cumplettads cun novs rempars preliminars. Ultra da quai vegnan sanadas differentas construcziuns per proteger la riva, vegn midada ina punt e vegn engrondì in collectur da gera.

-


Gremi: regenza
Funtauna: rg chanzlia chantunala dal Grischun
Neuer Artikel