Zum Seiteninhalt

Il chantun e la confederaziun sustegnan l'installaziun d'ina purschida dal turissem da sanadad en Engiadina

  • Erste Mitteilung
  • Neuen Beitrag einfügen
La novfundada Santasana San Murezzan SA stgaffescha en l'Engiadina ina nova purschida dal turissem da sanadad. Ensemen cun partenaris da tut la regiun vegnan creads programs individuals per la reabilitaziun e per la prevenziun da malsognas dal cor.

Per la nova purschida dal turissem da sanadad collavuran instituziuns ch'existan gia en l'Engiadina. Ultra da las instituziuns medicinalas èn sa cunvegnids partenaris da l'hotellaria, da la parahotellaria e da differentas instituziuns da sport e da fitness ad ina cooperaziun contractuala.

Programs individuals per pazients dal cor da tut il mund
La purschida dal turissem da sanadad da la Santasana sa drizza a giasts internaziunals sco er a pazientas ed a pazients cun problems dal cor da tut gener. Sut la direcziun medicala vegnan las visitadras ed ils visitaders tgirads medicinalmain e curads cun purschidas da terapia adattadas. Ultra da quai cuntegnan ils programs fatgs sin mesira differentas purschidas da coaching e da moviment, referats, activitads da temp liber, disposiziuns per il cas d'urgenza, alloschi ed alimentaziun.

Promoziun tras la nova politica regiunala
Er il chantun Grischun vesa in potenzial considerabel en las purschidas da l'economia da sanadad che s'orienteschan a la valurisaziun ed a l'export. L'uffizi per economia e turissem dal Grischun giuditgescha gist la colliaziun da las purschidas medicinalas e turisticas existentas sco fitg positiva. En la fasa d'installaziun vegnan perquai sustegnids – en il rom da la nova politica regiunala (NPR) – il svilup da las colliaziuns ed in'analisa correspundenta cun ina contribuziun dad 82 000 francs.

Vastas colliaziuns sut la direcziun da l'ospital universitar da Turitg
Las lavurs preparatoricas per installar Santasana San Murezzan SA tanschan gia lunsch enavos. Suenter ch'il project è vegnì preschentà per l'emprima giada a la publicitad il settember 2016, han pudì vegnir stabilidas en il fratemp ulteriuras collavuraziuns preziusas. La societad purtadra cooperescha stretgamain cun furniturs da prestaziuns regiunals. Latiers tutgan per exempel il Center terapeutic medicinal dal bogn da cura San Murezzan (CTM) sco er la clinica Gut.

En in'emprima fasa è vegnida lantschada ina collavuraziun cun ils hotels Laudinella, Reine Victoria e Kempinski Grand Hotel des Bains. Ils partenadis duain vegnir extendids permanentamain. La cumpetenza medicinala vegn sviluppada en stretga collavuraziun cun l'ospital universitar da Turitg. La direcziun medicinala e scientifica surpiglia Christian Schmied, directur da l'ambulanza cardiologica da l'ospital universitar da Turitg. Donat Marugg, schefmedi da blers onns a l'ospital d'Engiadin'ota, maina il team da medias e da medis al lieu. Da quest team fa er part Andi Grünenfelder, schefmedi per anestesia e medischina da sport a la clinica Gut a San Murezzan. La direcziun dal program da terapia surpiglia Britta Ahlden che maina dapi l'onn 2002 la fisioterapia dal CTM San Murezzan.


Infurmaziuns:
- cusseglier guvernativ dr. Jon Domenic Parolini, schef dal departament d'economia publica e fatgs socials, tel. 081 257 23 01, e-mail Jondomenic.Parolini@dvs.gr.ch
- Eugen Arpagaus, manader da l'uffizi per economia e turissem, tel. 081 257 23 77, e-mail Eugen.Arpagaus@awt.gr.ch
- dr. Rudolf Leuthold, manader da l'uffizi da sanadad, tel. 081 257 26 41, e-mail Rudolf.Leuthold@san.gr.ch


Gremi: departament d'economia publica e fatgs socials
Funtauna: rg departament d'economia publica e fatgs socials
Neuer Artikel