Zum Seiteninhalt

La regenza ha deliberà la revisiun totala da la lescha per promover la tgira da persunas malsaunas

  • Erste Mitteilung
  • Neuen Beitrag einfügen
La regenza ha deliberà la missiva tar la revisiun totala da la lescha per promover la tgira da persunas malsaunas per mauns dal cussegl grond. Tenor ina incumbensa dal cussegl grond duai la lescha vertenta da l'onn 1979 vegnir suttamessa ad ina revisiun totala formala.

Il december 2016 ha la regenza fatg ina consultaziun tar la revisiun parziala da la lescha per promover la tgira da persunas malsaunas. Ils puncts da revisiun han per gronda part chattà accoglientscha. Perquai ha la regenza concludì da far ina revisiun totala da la lescha per promover la tgira da persunas malsaunas empè da la revisiun parziala. Ina revisiun totala era gia vegnida pretendida dal postulat Nick ch'era vegnì acceptà dal cussegl grond la sessiun da mars 2003.

En vista materiala vegnan realisads quels puncts da la revisiun che han chattà accoglientscha en la consultaziun tar la revisiun parziala da la lescha. Percunter vegnì desistì da realisar la differenziaziun proponida dals custs da pensiun per promover dimoras curtas en chasas da persunas attempadas e da tgira. Cumplettond ils puncts da revisiun dal project da consultaziun vegn reglada en il sboz da lescha er la cumpetenza per la finanziaziun restanta d'abitantas e d'abitants da chasas da persunas attempadas e da tgira, tar ils quals ina dimora n'ha betg pudì vegnir eruida. Ultra da quai vegnan transferidas en la lescha disposiziuns impurtantas da las disposiziuns executivas davart l'organisaziun dal servetsch da salvament.

Grazia a la revisiun totala formala vegn meglierada considerablamain la survesaivladad ed uschia la chapaivladad e la legibladad da la lescha. En spezial crodan davent las lingias vidas ch'èn restadas perquai che numerus artitgels da la lescha èn vegnids abolids sco er las tabellas da las midadas da pliras paginas. Ultra da quai è vegnida meglierada la sistematica da la lescha envers la lescha vertenta.
La revisiun totala da la lescha cuntegna da nov 61 artitgels envers la lescha vertenta cun 101 artitgels.

Il tractament da la missiva tar la revisiun totala da la lescha per promover la tgira da persunas malsaunas è tractandà per la sessiun d'avust 2017 dal cussegl grond. La nova lescha duai entrar en vigur il 1. da schaner 2018.


Agiunta:
missiva


Infurmaziuns:
cusseglier guvernativ dr. Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch  


Gremi: regenza
Funtauna: rg chanzlia chantunala dal Grischun
Neuer Artikel