Zum Seiteninhalt

Communicaziun da la regenza dals 29 da zercladur 2017

  • Erste Mitteilung
  • Neuen Beitrag einfügen
La regenza ha approvà las midadas da la procedura d'admissiun a las scolas medias dal Grischun. Plinavant ha ella deliberà ina contribuziun chantunala per in project per il svilup regiunal da la Val Müstair.

Approvà las midadas da la procedura d'admissiun a las scolas medias dal Grischun
La regenza ha approvà la revisiun parziala da l'ordinaziun davart la procedura d'admissiun a las scolas medias. Gia avant in onn è vegnida repassada l'ordinaziun che deriva da l'onn 2008. Las adattaziuns han pertutgà oravant tut las premissas per l'admissiun da scolaras e scolars extrachantunals ed esters. Las experientschas e las enconuschientschas dals mais passads han mussà che las scolas medias privatas han adina dapli difficultads da recrutar scolaras e scolars extrachantunals ed esters. Perquai èsi vegnì concludì d'eliminar cun in ulteriur repassament da las disposiziuns d'admissiun eventuals dischavantatgs da concurrenza pertutgant la recrutaziun da scolaras e scolars extrachantunals ed esters en cumparegliaziun cun scolas medias privatas d'auters chantuns. Empè da la selecziun sur l'examen d'admissiun chantunal vegnan las scolas medias privatas a stuair examinar en il rom d'ina procedura tenor las disposiziuns internas da la scola, sche las scolaras ed ils scolars extrachantunals ed esters che duain vegnir admess e che na frequentan anc betg ina scola media han las abilitads da scola ch'èn necessarias per absolver cun success ina scola media. L'examen d'admissiun chantunal pon far il proxim onn da scola mo pli scolaras e scolars, dals quals ils geniturs han lur domicil en il Grischun.

Approvà projects d'avertura dal guaud a Sursaissa ed a Jenins
Per garantir duraivlamain las funcziuns dal guaud dovri ina tgira ed ina cultivaziun correspundenta da tal. Actualmain n'han quests guauds dentant savens betg in access suffizient. Per Sursaissa e per Jenins ha la regenza approvà dus projects d'avertura dal guaud per meglierar là la situaziun.
A Sursaissa sa tracti concretamain da la segunda etappa dal project "Friggahüs fin Oberhuot". La via vegn schlargiada ad ina ladezza da 3,3 meters sin ina lunghezza da var 2,1 kilometers. Supplementarmain vegnan construids u renovads stabiliments d'allontanament da l'aua e construcziuns artifizialas. Cun la renovaziun vegnan meglieradas en l'entir territori da project las pussaivladads per la racolta e per il transport da laina. Per quest project garantescha la regenza a la vischnanca da Sursaissa ina contribuziun da circa 3,15 milliuns francs.
Er la vischnanca da Jenins sa stgaffescha meglras cundiziuns cun in project d'avertura dal guaud. Il project approvà da la regenza "Sviament Jenins" cumenza sur Jenins a l'uschenumnà "Schwiibödeli" tar la via d'alp existenta, traversa cun in traject nov da 140 meters in prà, suonda alura sin circa 600 meters la via champestra existenta e finescha a la "Teilerrüfe". Ultra da l'avertura dal guaud serva la via er a la cultivaziun agricula dals prads vischins e distgargia il center dal vitg dal traffic agricul e forestal. Al project vegn garantida ina contribuziun da circa 650 000 francs.

- -
Segunda etappa dal project "Friggahüs fin Oberhuot" a Sursaissa (a sanestra) ed en la perspectiva d'utschè il project "Sviament da Jenins"

Approvà in project collectiv per ovras da protecziun
La regenza ha approvà in project collectiv "Reparaziun d'ovras da protecziun 2017" da differentas vischnancas, da la Viafier retica e da l'uffizi da construcziun bassa dal Grischun. Il project ha la finamira da conservar ovras da protecziun existentas cunter privels da la natira mantegnend il standard oriund sco er da meglierar l'effect da quests stabiliments. Pertutgads dal project collectiv èn 47 objects. Ils custs totals importan 8,1 milliuns francs.

Survista dals projects d'ovras da protecziun

Contribuziun chantunala al project per il svilup regiunal
La regenza ha approvà il project cuminaivel per il svilup regiunal (PSR) da la Val Müstair. Projects cuminaivels per il svilup regiunal duain dar in impuls al svilup da l'agricultura per ch'ella daventia pli cumpetitiva en in martgà che daventa adina pli dir e pli dinamic. Il PSR Val Müstair cumpiglia ils suandants projects parzials: edifizi nov per la chascharia Val Müstair, acquisiziun da spazi per il fain, edifizi nov per l'elavuraziun da charn inclusiv in stabiliment da maz, center da rimnada per graun, installaziun dal marketing e commerzialisaziun dals products sco er gestiun / manaschament da projects.
La confederaziun renconuscha per quest project general custs subvenziunabels da circa 4,85 milliuns francs. Da quai resulta ina contribuziun federala da circa 1,94 milliuns francs. Las contribuziuns da la confederaziun premettan ina cuntraprestaziun chantunala. Pervia da la tariffa da contribuziun predefinida garantescha il chantun Grischun al project ina contribuziun da circa 1,55 milliuns francs.

Basa per in restaurant nov a Madulain
La regenza ha approvà la revisiun parziala da la planisaziun locala da Madulain, concludida da la vischnanca ils 24 d'october 2016. Uschia stgaffescha ella la premissa giuridica per realisar in restaurant public en il plaun sura da l'edifizi existent da la basa tecnica.
L'edifizi da la basa tecnica vegn engrondì vers vest cun ina terrassa sco er cun in sectur d'access nov per il restaurant planisà.

-
©Comet Photoshopping ScRL / Dieter Enz


Gremi: regenza
Funtauna: rg chanzlia chantunala dal Grischun
Neuer Artikel