La regenza ha elegì Conradin Luzi sco successur dad Alberto Crameri sco secretari dal departament da construcziun, traffic e selvicultura.

L'advocat Conradin Luzi che ha 36 onns vegn a cumenzar sia nova plazza il 1. da favrer 2018. El remplazza il secretari dal departament da blers onns Alberto Crameri che va en pensiun la fin da schaner 2018.

Conradin Luzi ch'è naschì e creschì si a Cuira ha studegià giurisprudenza a l'universitad da Turitg. Quest studi ha el terminà cun il licenziat. Suenter in temp d'assistenza da 3 onns a la professura per il dretg da taglia, da finanzas e d'administraziun a l'universitad da Turitg ha el absolvì differents praticums da dretg en l'administraziun chantunala sco er a la dretgira chantunala dal Grischun. Dapi il cumenzament da l'onn 2013 lavura Conradin Luzi sco collavuratur giuridic en il departament da construcziun, traffic e selvicultura cun ils secturs centrals aua, energia e traffic public. Il medem onn ha el acquistà la patenta d'advocat dal Grischun.

Las incumbensas principalas da questa funcziun-clav èn il sustegn dal schef dal departament da construcziun, traffic e selvicultura en dumondas materialas e politicas sco er en la direcziun, l'organisaziun, la coordinaziun e la communicaziun en il sectur da cumpetenza dal departament. Il secretari dal departament è ultra da quai responsabel per la direcziun dal servetsch giuridic central dal departament. Il medem mument maina el il secretariat areguard il persunal, l'organisaziun e la materia.

Fotografia agiuntada:

Infurmaziuns:
cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 14, e-mail: Mario.Cavigelli@bvfd.gr.ch


Gremi: departament da construcziun, traffic e selvicultura
Funtauna: rg departament da construcziun, traffic e selvicultura