Zum Seiteninhalt

Project dal Grischun ha survegnì premi principal da la ARGE ALP 2017

  • Erste Mitteilung
  • Neuen Beitrag einfügen
Oz, a chaschun da la conferenza da las scheffas e dals schefs da las regenzas a Lautrach en Baviera, è vegnì surdà il premi da la ARGE ALP 2017 per projects concernent l'integraziun en il territori alpin. Il project "Ospitalitad senza cunfins en in Tavau avert" dal Grischun ha gudagnà in dals trais premis principals en la valur da 6000 euro.

Cun il premi da la ARGE ALP da quest onn èn vegnids undrads projects innovativs concernent l'integraziun en il territori alpin. Igl èn vegnids tschertgads projects che rinforzan la coesiun sociala en las regiuns commembras e l'identificaziun culturala cun il territori alpin tant dals indigens sco er dals novarrivads. Da tut ils pajais, las regiuns, las provinzas ed ils chantuns da la ARGE ALP èn vegnids inoltrads passa 100 projects d'integraziun. Ina giuria internaziunala ha fatg la premiaziun ed ha distribuì tut en tut trais premis principals da mintgamai 6000 euro e sis premis da renconuschientscha da mintgamai 1000 euro.

Ospitalitad senza cunfins a Tavau

Il project "Ospitalitad senza cunfins en in Tavau avert" dal Grischun ha gudagnà in dals trais premis principals en la valur da 6000 euro. L'uniun Cuminanza d'interess per in Tavau avert (CITa) sustegna requirentas e requirents d'asil sco er fugitivas e fugitivs a schliar problems dal mintgadi. La CITa iniziescha mintga onn passa 70 occurrenzas interculturalas ed è il post da contact per la populaziun indigena. Grazia a l'engaschament da bleras acturas e da blers acturs voluntars exista en la regiun ina tenuta da basa da princip positiva envers las fugitivas ed ils fugitivs. L'integraziun è mo pussaivla, sche er la societad che retschaiva las persunas ha il curaschi per la discussiun e per l'inscunter cun la singula fugitiva ed il singul fugitiv. Ina invista en il project dat il film da la chanzlia chantunala dal Grischun.

Fotografia agiuntada:
-
La presidenta da la regenza Barbara Janom Steiner (a sanestra) e la ministra da la Baviera Beate Merk (a dretga) gratuleschan als titulars dal premi da la ARGE ALP Philipp Wilhelm e Johanna Veit Gröbner dal project "Ospitalitad senza cunfins en in Tavau avert".


Infurmaziuns:
- presidenta da la regenza Barbara Janom Steiner, scheffa dal departament da finanzas e vischnancas dal Grischun, e-mail: Barbara.Janom@dfg.gr.ch (ella telefona lura enavos)
- Dumondas da las medias per telefon: Tamara Kobler, incumbensada per l'infurmaziun dal chantun Grischun, tel. 079 792 19 37


Gremi: ARGE ALP / regenza dal chantun Grischun
Funtauna: rg chanzlia chantunala dal Grischun
Neuer Artikel

Video