Zum Seiteninhalt

Il cusseglier guvernativ Rathgeb sa scuntra cun il mainagestiun dal HCD

  • Erste Mitteilung
  • Neuen Beitrag einfügen
Dacurt èn il cusseglier guvernativ Christian Rathgeb, schef dal departament da giustia, segirezza e sanadad, Walter Schlegel, cumandant da la polizia chantunala dal Grischun, e Regula Hunger, secretaria dal departament, sa scuntrads cun Bill B. Mistura, mainagestiun dal club da hockey da Tavau (HCD). Il tema principal da la discussiun è stà la segirezza tar ils gieus da hockey sin glatsch a Tavau.

A la scuntrada da quest onn cun il mainagestiun dal HC Tavau è vegnida tractada ed analisada la stagiun passada. La stagiun vegninta vegn preparada correspundentamain. La scuntrada ha mussà che la collavuraziun funcziuna bain en il sectur da segirezza. Da tuttas duas varts èn vegnids giuditgads sco prezius e cunvegnents tant l'inscunter annual sin il stgalim directiv sco er ils contacts regulars e las cunvegnas en il sectur operativ. La collavuraziun tranter il servetsch da segirezza dal HCD e la polizia chantunala dal Grischun funcziuna perfetgamain ed è sa cumprovada. Sco problematics vegnan giuditgads ils marschs da fans sco er paucas persunas ch'èn prontas da duvrar violenza, che vegnan autonomamain a Tavau e che la polizia enconuscha. Ultra da quai dovri mintgamai mo per paucs gieus da hockey ina clamada pli gronda da polizists.

In laud als fans ed als clubs da fans

La bilantscha per gronda part positiva è er d'engraziar als fans exemplarics ed als clubs da fans dal HC Tavau. Tras lur engaschi da blers onns procuran els ch'il sport stettia en il center e che la violenza n'haja nagina plazza en ils conturns da gieus da hockey sin glatsch en il Grischun. Grazia a las persunas incumbensadas per dumondas da hooligans exista in bun contact cun la polizia chantunala, ed ils aspectaturs ch'èn pronts da duvrar violenza pon vegnir identifitgads a temp.


Infurmaziuns:
- Cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch
- Bill B. Mistura, mainagestiun dal club da hockey da Tavau, tel. 079 600 34 92, e-mail b.mistura@hcd.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad
Neuer Artikel