Zum Seiteninhalt

Communicaziun da la regenza dals 24 d'avust 2017

  • Erste Mitteilung
  • Neuen Beitrag einfügen
La regenza pretenda ina midada tar las taxas da roaming ed ha concedì contribuziuns chantunalas per stizzar ils incendis da guaud dal december passà en il Grischun dal sid.

La confederaziun duai sa participar a la cunvegna europeica da roaming
La regenza ha surdà ina brev a la presidenta da la confederaziun Doris Leuthard. Il motiv per questa brev èn ils dischavantatgs da concurrenza che las taxas da roaming chaschunan per il turissem en Svizra. Per ils 15 da zercladur 2017 han ils 28 stadis da la UE fixà cuminaivlamain limitas maximalas liantas per il commerzi a l'engrossa cun pretschs da roaming. A questa regulaziun èn sa participads er il Liechtenstein, la Norvegia e l'Islanda. Per la Svizra resulta uschia en cumparegliaziun directa cun quests pajais – en spezial cun l'exteriur vischin – in dischavantatg da concurrenza en il turissem.
Gist en las destinaziuns turisticas dal Grischun vegn quai ad avair consequenzas considerablas. Entant che per exempel in giast da la Germania po far diever da ses telefon mobil en autras destinaziuns alpinas per las tariffas usitadas, resultan en Svizra taxas supplementaras ed eventualmain fitg autas. La regenza grischuna pretenda perquai da la confederaziun da cumenzar immediatamain e prioritarmain cun las tractativas davart la participaziun da la Svizra a la cunvegna europeica da roaming.

Il chantun sa participescha finanzialmain a l'acziun da stizzar ils incendis en il Grischun dal sid
Ils 27 e 28 da december 2016 hai dà incendis da guaud l'emprim tranter Mesauc e Soazza en la Val Mesauc e l'auter di a Braggio en la Val Calanca. Pervia da la gronda setgira ed en spezial pervia dal ferm favugn dal nord han ils dus incendis da guaud pudì sa derasar fitg svelt. Mo grazia a l'intervenziun gronda da superpumas da l'armada svizra, da helicopters civils, da plirs corps da pumpiers, dal servetsch forestal e da las appartegnentas e dals appartegnents da la protecziun civila han ils incendis pudì vegnir franads e per gronda part stizzads.
Il chantun Grischun paja ussa contribuziuns per stizzar ils dus incendis da guaud. A las vischnancas da Mesocco e da Soazza ha la regenza concedì ina contribuziun chantunala da circa 371 000 francs a favur dals custs da stizzar fieu da totalmain var 742 000 francs. Als custs da radund 98 500 francs da la vischnanca da Calanca paja il chantun ina contribuziun da circa 43 300 francs.

-
©Aris Cereghetti

In torrent sur Tavau è in privel en situaziuns d'aua gronda
La regenza ha approvà in project per construir rempars per il torrent Totalpbach a Tavau. Las controllas tecnicas las pli novas han mussà ch'il torrent che po chaschunar bovas è in privel pli grond en situaziuns d'aua gronda. Il project ha la finamira da reducir quest privel ad ina dimensiun acceptabla. Da princip na duain vegnir periclitads nagins edifizis u stabiliments d'infrastructura sensibels fin ad in eveniment dal tschientaner. A medem temp vegnan sanadas parts donnegiadas dal rempar existent.
Tenor la cunvegna da program "ovras da protecziun cunter l'aua" sa participeschan la confederaziun ed il chantun finanzialmain als custs da quest rempar. Dals custs da tut en tut var 3,46 milliuns francs surpiglia la confederaziun maximalmain 1,21 milliuns francs ed il chantun maximalmain 865 000 francs.

Las vias da guaud a Mastrils vegnan renovadas
Ils guauds al sidvest da Mastrils cumpiglian per part guaud da protecziun e protegian uschia il vitg, las vias chantunalas e communalas da colliaziun sco er ils bains agriculs cunter lavinas, sbuvadas, bovas ed aua gronda. Per garantir a lunga vista questa funcziun da protecziun ston ils guauds vegnir tgirads e cultivads correspundentamain. Actualmain n'han quests guauds dentant betg in access suffizient, u las vias existentas èn per part en in nausch stadi.
Per meglierar questa situaziun ha la regenza approvà il project da sanaziun e da renovaziun "Mastrils-Wieseli" da la vischnanca da Landquart. Ultra da quai ha la regenza garantì per quest project ina contribuziun da circa 742 000 francs. Tras quai duai d'ina vart l'access "Mastrils-Wieseli" vegnir sanà e per part vegnir schlargià a 3 meters. Da l'autra vart duai la via "Wieseli-Tanzboden" vegnir schlargiada cumplettamain a 3 meters.

A Fläsch po vegnir realisada ina nova halla da chavaltgar
La regenza ha approvà ina revisiun parziala da la planisaziun locala ch'era vegnida concludida da la vischnanca da Fläsch. Uschia vegn determinada en il plan da zonas da la vischnanca ina "zona per la tegnida da chavals" en il territori "Neuländer". La nova zona duai permetter l'extensiun dal manaschi agricul existent "Neuländer" cun ina tegnida da chavals. Tranter auter è planisada la construcziun d'ina halla da chavaltgar, d'in indriz da diriger ils chavals sco er d'ina plazza per tutt'aura.

-
©Uffizi federal da topografia

Midada da zona per engrondir en l'avegnir in hotel en Engiadin'ota
La regenza ha approvà la revisiun parziala da la planisaziun locala da La Punt-Chamues-ch, concludida da la vischnanca ils 21 d'avrigl 2017. Uschia vegn la parcella da l'hotel transferida da la "zona d'abitar A" en la "zona dal vitg". Tras quai vegnan ademplidas las premissas giuridicas per engrondir en l'avegnir l'hotel "Chesa Staila". En la "zona d'abitar A" vertenta na fissi betg stà pussaivel da sviluppar il manaschi da restauraziun e d'hotellaria en moda adequata.

-
©Comet Photoshopping ScRL / Dieter Enz


Gremi: regenza
Funtauna: rg chanzlia chantunala dal Grischun
Neuer Artikel