Zum Seiteninhalt

Contribuziuns da l'onn 2018 per la gulivaziun da finanzas grischuna

  • Erste Mitteilung
  • Neuen Beitrag einfügen
La regenza ha fixà las contribuziuns da gulivaziun per l'onn 2018 da las 108 vischnancas grischunas sco er la gulivaziun da las grevezzas socialas da l'onn 2016. Totalmain vegnan pajadas contribuziuns da 61,5 milliuns francs.

Il potenzial da resursas decisiv per l'onn da gulivaziun 2018 è creschì – sur tut las vischnancas – per 20,5 milliuns francs sin 768,0 milliuns francs (+2,7 pertschient). Il potenzial da resursas è decisiv per eruir las contribuziuns da gulivaziun e represchenta la capacitad finanziala dal chantun. El correspunda a la valur da las resursas fiscalmain explotablas. Ina survista da las singulas vischnancas grischunas dat l'uschenumnà index dal potenzial da resursas che cumpareglia las vischnancas cun bleras resursas e quellas cun paucas resursas cun la media chantunala (100 puncts en l'index da PR).

Entant che las taglias da las persunas natiralas e da las persunas giuridicas èn s'augmentadas durant ils onns da taxaziun, han ins stuì resguardar durant l'entira perioda ina reducziun dals tschains d'aua. Il potenzial da resursas mesaun per persuna chantunala decisiva importa 3730 francs (onn precedent: 3631 francs). En cas d'entradas da la medema autezza ed en cas d'in dumber da persunas decisiv tal e qual sa sbassa pia l'index dal potenzial da resursas d'ina vischnanca envers quel da l'onn precedent. Quest effect pon ins observar tar differentas vischnancas. La marscha en connex cun il potenzial da resursas sa reducescha in pau e tanscha da la vischnanca da Furna ch'è actualmain la pli debla cun 32 puncts (2017: 35 puncts) fin a la vischnanca da Farera ch'è la pli ferma cun 608 puncts (2017: 652 puncts).

Per la gulivaziun da las resursas 2018 vegnan mantegnids ils parameters da l'onn precedent: I vegnan applitgadas vinavant la tariffa da prelevaziun da 16,0 pertschient ed ina dotaziun minimala da 68,0 pertschient da la media chantunala. Tras quai survegnan 70 vischnancas totalmain 29,2 milliuns francs or da la gulivaziun da las resursas. Quai correspunda ad in augment envers l'onn precedent dad 1,6 milliuns francs u da 5,8 pertschient. Las contribuziuns vegnan messas a disposiziun dal chantun (circa 9,1 milliuns francs) e da 38 vischnancas finanzialmain fermas (circa 20,1 milliuns francs).

Da la gulivaziun da las grevezzas geografic-topograficas e da scola survegnan 51 vischnancas autorisadas sco l'onn precedent totalmain 24 milliuns francs. Quests meds finanzials vegnan mess a disposiziun dal tuttafatg dal chantun. La contribuziun la pli gronda survegn cun 2,2 milliuns francs la vischnanca da Tavau.

Il chantun conceda ina gulivaziun a quellas vischnancas ch'èn suttamessas ad ina grevezza sproporziunada en il sectur da l'agid social material. Questa contribuziun vegn calculada a maun dals custs nets da las vischnancas en proporziun cun lur potenzial da resursas. Sin dumonda da las vischnancas vegnan las contribuziuns da gulivaziun fixadas mintgamai l'onn suandant. Per l'onn 2016 han – suenter l'examinaziun da basa – 31 vischnancas il dretg da survegnir contribuziuns da totalmain 7,1 milliuns francs or da la gulivaziun da las grevezzas socialas. La part principala pertutga cun 5,2 milliuns francs la citad da Cuira.

Set vischnancas cun paucas resursas survegnan l'onn 2018 dal chantun supplementarmain ina gulivaziun limitada da tut en tut 1,2 milliuns francs (onn precedent: 1,6 milliuns). Questa gulivaziun facilitescha a questas vischnancas da midar al nov sistem da gulivaziun da finanzas.

Ils parameters da la gulivaziun da las resursas da l'onn 2018 sco er il volumen total da l'onn 2018 per la gulivaziun da las grevezzas geografic-topograficas e da scola e per la gulivaziun individuala d'inegualitads per grevezzas extraordinarias vegn il cussegl grond a fixar definitivamain cun il preventiv 2018.

Agiuntas:
tabella da la gulivaziun da finanzas 2018 (GRes e GGG) per vischnanca
grafica da la gulivaziun da las resursas per persuna: cumparegliaziun 2018/2017
grafica da la repartiziun da las vischnancas tenor l'index dal potenzial da resursas 2018 e 2017
tabella cun las midadas da la GRes e da la GGG 2017/2018
tabella da la gulivaziun da las grevezzas socialas 2016 per vischnanca


Infurmaziuns:
presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01, e-mail Barbara.Janom@dfg.gr.ch


Gremi: regenza
Funtauna: rg chanzlia chantunala dal Grischun
Neuer Artikel