L'uffizi da vischnancas envida oz suentermezdi puspè a la dieta da vischnancas en l'arena grischuna a Cazas. Circa 250 represchentants da las autoritads da stgars 90 vischnancas grischunas sa participeschan a la terza occurrenza. La presidenta da la regenza Barbara Janom Steiner explitga als participants las fatschentas currentas da ses departament. Ultra da quai vegn cusseglier guvernativ Mario Cavigelli ad infurmar quest onn davart ils svilups ils pli novs en il sectur da la forza idraulica.

Circa 250 persunas sa scuntran en l'arena grischuna a Cazas e sa laschan infurmar davart ils temas relevants dal departament da finanzas e vischnancas (DFV). La presidenta da la regenza Barbara Janom Steiner ha plaschair da l'interess ch'è danovamain grond per ina tala dieta. Ella resguarda quai sco impurtant ch'in barat regular d'infurmaziuns e d'ideas haja lieu tranter il chantun e las vischnancas.

Novitads dal departament da finanzas e vischnancas
La scheffa dal DFV infurmescha davart la revisiun totala da la lescha da vischnancas che vegn fatga actualmain. Ulteriurs puncts centrals da ses referat èn la realisaziun cun success da la refurma dal territori sco er las numerusas fusiuns dals ultims dus onns. Er ils svilups ils pli novs en il sectur da la legislaziun fiscala chantunala tracta ella precis uschia sco quels en il sectur da las stimaziuns chantunalas d'immobiglias.

Novitads da l'uffizi da vischnancas
Da l'uffizi da vischnancas survegnan las autoritads preschentas infurmaziuns davart fatschentas currentas dals posts da servetsch. Il manader da l'uffizi Thomas Kollegger orientescha davart il stadi da la realisaziun cun success dal model armonisà da contabilitad per preventivs publics MAC2 e davart la gulivaziun da finanzas. Plinavant illustrescha el a maun da singuls exempels las explicaziuns da la presidenta da la regenza Barbara Janom Steiner concernent la revisiun totala da la lescha da vischnancas che vegn fatga actualmain. A la dieta da quest onn sa participescha ultra da quai in ulteriur commember da la regenza.

Novitads dal sectur da la forza idraulica
Il cusseglier guvernativ Mario Cavigelli, schef dal departament da construcziun, traffic e selvicultura, referescha davart ils svilups ils pli novs en il sectur da la forza idraulica e dals tschains d'aua. La fin da zercladur 2017 ha il cussegl federal avert la consultaziun tar la revisiun parziala da la lescha davart il dretg da las auas. La reducziun dal tschains d'aua maximal proponida sco soluziun transitorica refusa la regenza grischuna. Per defender cun vusch unida ils interess dals chantuns da muntogna vegn ella ad elavurar sia posiziun sin basa da la posiziun da la conferenza da las regenzas dals chantuns alpins (CRCA). En quest connex ha la regenza l'intenziun d'integrar uschè bain sco pussaivel er las posiziuns da las vischnancas.

Inputs dals referats spezials
"Nus faschain da sa zuppar" – uschia sa numna il titel in zic provocativ dal referat infurmativ da Pius Kessler, schurnalist e docent da las medias online. El quinta davart sias experientschas cun las vischnancas sco collavuratur da las medias. Thomas Leisinger, manader da la partiziun "Famiglia, uffants e giuvenils" da l'uffizi chantunal dal servetsch social punctuescha l'impurtanza dal rinforzament da la lavur cun giuvenils ensemen cun Samuel Gilgen, manader dal post spezialisà jugend.gr. Da la rait da medis grischuna Grisomed dastga vegnir salidà il mainagestiun Gieri Derungs. El referescha davart la tematica "Provediment medical da basa – ina incumbensa strategica per politichers communals". Cun la preschentaziun dal nov chancelier Daniel Spadin vegn la dieta cumplettada.


Infurmaziuns:
presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01, e-mail Barbara.Janom@dfg.gr.ch


Gremi: departament da finanzas e vischnancas
Funtauna: rg departament da finanzas e vischnancas