Zum Seiteninhalt

Il parc industrial Vial a Domat survegn conturas

  • Erste Mitteilung
  • Neuen Beitrag einfügen

Tras il parc industrial Vial survegn l'areal da l'anteriura resgia a Domat ina nova fatscha: Entaifer dus onns ha il chantun Grischun promovì cun grond schlantsch la midada pretensiusa da l'utilisaziun da l'areal ad in parc industrial per interpresas d'auta tecnologia. L'emprima investidra, la Hamilton Ems SA, ha gia realisà la construcziun brutta.

Il parc industrial Vial ademplescha en in lieu d'industria attractiv las pretensiuns d'interpresas ch'èn activas sin plaun internaziunal. Las lavurs da demoliziun dals edifizis èn terminadas, l'allontanament da la cuvrida e dals conducts d'ovra è en lavur. Cun la construcziun da la via d'avertura èsi gia vegnì cumenzà. La surfatscha betg utilisada vegn ensemnada il cumenzament da l'onn proxim. Grazia a la buna collavuraziun tranter il chantun, la Hamilton sco er la vischnanca e la vischnanca burgaisa da Domat sa sviluppa la midada d'utilisaziun al parc industrial tenor ils plans.

Project da generaziuns cun potenzial

En connex cun la domiciliaziun d'interpresas vul il chantun laschar sapientivamain temp e dar paisa a la qualitad. I sa tracta d'in project da generaziuns cun in grond potenzial per l'economia publica. Quest potenzial vali da trair a niz cun domiciliar interpresas ch'èn orientadas a l'export, che han ina valurisaziun intensiva e che s'orienteschan en spezial a la tecnologia. Basas decisivas furman en quest connex la lescha communala da construcziun, il plan d'areal e las directivas chantunalas. Cun trais interpresas han actualmain lieu discurs. Uschia er cun la Kamkorp Group da la Gronda Britannia che ha – cun ses products da mobilitad electrica – gia communitgà publicamain ses interess.

Producziun d'auta tecnologia per la Hamilton Ems SA

La Hamilton, il concern da scienzas da la vita e da tecnica medicinala che crescha d'in cuntin, è posiziunada fermamain tranter auter en il sectur da la digitalisaziun e da la genetica. Sper Panaduz daventa ussa en Svizra Domat il nov dachasa da products innovativs e prospectivs. En il nov edifizi endrizza la Hamilton Ems SA ina producziun d'auta tecnologia per producir en moda effizienta e persistenta bains da consum intelligents per ils agens products. Fin ussa vegnivan quests bains retratgs da furniturs. Tras l'atgna producziun vegn optimada la chadaina da creaziun da valur e garantida l'independenza. En il nov edifizi, ch'è vegnì sviluppà tenor ils standards ils pli moderns, vegnan stgaffidas 100 novas plazzas da lavur. La construcziun brutta cun quatter plauns è gia terminada. L'edifizi po vegnir retratg la primavaira 2018 sco planisà.

Nova corporaziun da chalur per Domat
Cun la IBC Energie Wasser da Cuira e cun la Rhiienergie SA ha la vischnanca da Domat fundà ina societad simpla per installar ina corporaziun da chalur Domat. L'emprima clienta è la Hamilton Ems SA che retira sia energia da questa societad. Tras l'installaziun da la corporaziun da chalur na vul la vischnanca da Domat betg mo metter a disposiziun energia termica al parc industrial Vial, mabain en in ulteriur pass er a la part vest da Domat. L'utilisaziun da la chalur persa dals manaschis industrials vischins correspunda lura er a la strategia da la vischnanca da Domat sco citad d'energia certifitgada da nov. L'augment da la valur da l'areal da l'anteriura resgia a Domat tras la midada al parc industrial cuntinuescha pia er en connex cun il provediment d'energia. Er la vischnanca burgaisa da Domat sco proprietaria dal terren beneventa il svilup dal nov parc industrial Vial a Domat ed è persvadida da ses niz per l'economia publica da la Val dal Rain grischuna e da l'entir chantun.

Fotografias agiuntadas:

-
-

Ulteriuras infurmaziuns:
Flyer dal parc industrial Vial a Domat
Plan d'areal Vial-Tuleu


Infurmaziuns:
cusseglier guvernativ dr. Jon Domenic Parolini, tel. 081 257 23 01, e-mail Jondomenic.Parolini@dvs.gr.ch


Gremi: departament d'economia publica e fatgs socials
Funtauna: rg departament d'economia publica e fatgs socials

Neuer Artikel