La cumissiun per politica da stadi e strategia propona al cussegl grond d'acceptar la revisiun totala da la lescha da vischnancas. Il cussegl grond vegn a tractar quest project en la sessiun d'october 2017.

La cumissiun dal cussegl grond per politica da stadi e strategia ha predeliberà durant trais sesidas la missiva da la regenza tar la revisiun totala da la lescha da vischnancas. Quai sut la direcziun dal president da la cumissiun Tarzisius Caviezel (Tavau Clavadel) ed en preschientscha da la presidenta da la regenza Barbara Janom Steiner sco scheffa dal departament da finanzas e vischnancas.

La lescha da vischnancas vertenta datescha da l'onn 1974 ed è sa cumprovada. Oz vali dentant da tegnair quint da las diversas revisiuns parzialas e da las midadas economicas, socialas ed organisatoricas e d'adattar la lescha a la pratica d'ozendi en il rom d'ina revisiun totala. La lescha da vischnancas duai esser er en l'avegnir in relasch general per l'organisaziun da las vischnancas che serva a l'adempliment da lur incumbensas. Il project da lescha è ussa pli concis e cuntegna mo quellas disposiziuns legalas che duain en mintga cas esser unitaras per tut las vischnancas. La nova lescha da vischnancas tegna quint da la gronda autonomia communala. La cumissiun ha beneventà il fatg ch'il project conceda a las vischnancas la pli gronda libertad creativa pussaivla per realisar atgnas soluziuns.
La gronda maioritad da la cumissiun ha sustegnì la proposta da la regenza. In vast consentiment hai dà per la pussaivladad da las vischnancas da far votaziuns consultativas, ma er per la regulaziun da las fusiuns da vischnancas che sa restrenscha a l'essenzial. Ultra da quai ha la cumissiun sustegnì ch'i vegnia exclus da furmar novas fracziuns sco corporaziuns autonomas e che la regulaziun actuala davart la grondezza da la suprastanza communala vegnia mantegnida. En singuls puncts hai dà opiniuns divergentas. Uschia propona la maioritad da la cumissiun ch'i duaja esser chaussa da las vischnancas d'excluder la publicitad da radunanzas communalas. Er areguard la facultad d'utilisaziun da las vischnancas n'ha la cumissiun betg chattà in consens. Tar la facultad d'utilisaziun tutgan parts dal territori communal (alps, pastgiras, guauds e.u.v.) ch'ils abitants pon utilisar, per exempel in pur che metta ad alp ses muvel durant la stad. La regenza vuless er vinavant che mo burgaisas svizras e burgais svizzers hajan il dretg da questa facultad d'utilisaziun. La maioritad da la cumissiun vuless dentant che tut las abitantas e tut ils abitants da la vischnanca hajan il dretg da la facultad d'utilisaziun. Las vischnancas duain dentant avair la cumpetenza da relaschar er en quest sectur regulaziuns adattadas. Areguard l'alienaziun da facultad d'utilisaziun giavischa ina ferma maioritad da la cumissiun che la regulaziun vertenta vegnia mantegnida. La nova lescha da vischnancas entra previsiblamain en vigur il 1. da fanadur 2018. Vischnancas che ston adattar lur organisaziun han temp da far quai fin la fin da l'onn 2019 resp. 2022.

La cumissiun propona al cussegl grond d'acceptar la revisiun totala da la lescha da vischnancas.


Infurmaziuns:
Tarzisius Caviezel (Tavau Clavadel), president da la cumissiun per politica da stadi e strategia, tel. 079 610 23 70


Gremi: cumissiun per politica da stadi e strategia
Funtauna: rg cumissiun per politica da stadi e strategia