Zum Seiteninhalt

Consultaziun tar la revisiun totala da la lescha davart las scolas medias

  • Erste Mitteilung
  • Neuen Beitrag einfügen
Tenor il program da la regenza 2017-2020 duai la lescha davart las scolas medias en il chantun Grischun vegnir revedida. La revisiun totala duai garantir ch'il chantun possia pussibilitar als giuvenils grischuns – tegnend quint da la midada demografica – vinavant ina scolaziun decentrala ad ina scola media che als prepara optimalmain per in studi en ina scola auta.

Cumpareglià cun l'onn da scola 2003/04 vegn il dumber da scolaras e scolars dal Grischun a las scolas medias en il chantun a sa reducir tenor las calculaziuns approximativas da 2915 a 1981 per l'onn da scola 2023/24 (stadi da la prognosa: 1. da settember 2016), e quai pervia dal svilup demografic. Quai correspunda ad in regress da var 32 pertschient e munta ina gronda sfida per la cuntrada da scolas medias. L'augment da las contribuziuns per gimnasiasta u gimnasiast ch'è vegnì concludì en l'ultima revisiun parziala da la lescha davart las scolas medias na po betg cumpensar las consequenzas da la diminuziun da las naschientschas.

La cuntrada da scolas medias decentrala duai vegnir mantegnida

Suenter che la voluntad politica da mantegnair la cuntrada da scolas medias decentrala è anc adina avant maun, malgrà il regress dal dumber da scolaras e scolars, sto vegnir elavurada ina soluziun per mantegnair las structuras dadas da la cuntrada da scolas medias en Grischun resguardond però ch'il dumber da scolaras e scolars a las scolas medias dal Grischun vegn a sa reducir vinavant ils proxims onns. Per quest intent è vegnida dada l'incumbensa da far in'expertisa giuridica externa che tracta las pretensiuns envers ina purschida decentrala da scolas medias ch'il chantun sto observar tenor l'art. 89 al. 3 da la constituziun dal chantun Grischun. Las enconuschientschas da l'expertisa giuridica furman las saivs directivas concepziunalas per la revisiun totala da la lescha davart las scolas medias en il chantun Grischun dals 7 d'october 1962.

Concordanza tranter purschidas chantunalas e privatas

La finamira da la revisiun totala da la lescha davart las scolas medias è quella da mantegnair sche pussaivel las structuras da scola media cumprovadas cun ina scola media chantunala ad in u a plirs lieus sco er cun scolas medias decentralas organisadas tenor il dretg privat e sustegnidas dal chantun resguardond la giustia da furmaziun.

Ultra da la rectificaziun structurala dal text da lescha ch'è vegnì revedì parzialmain differentas giadas cumpiglia la revisiun totala en spezial la stabilisaziun d'incaricas da prestaziun a las scolas medias sco element directiv strategic. Il chantun duai pudair intervegnir ad ura, sche per exempel ina scola media privata na po betg pli cuntinuar cun ses manaschi ord atgna forza. Plinavant duai vegnir creada la basa legala per ch'il chantun possia pajar ina contribuziun pauschala a l'alloschi ed a l'alimentaziun per scolaras grischunas e scolars grischuns che abitan en ina chasa da dimora d'ina scola media privata.

La regenza dal chantun Grischun dat en consultaziun in project satigl. La lescha duai entrar en vigur il 1. d'avust 2019.

La consultaziun dura fin ils 5 da favrer 2018. Ils documents respectivs pon vegnir consultads en l'internet sut
www.ekud.gr.ch Rumantsch / Sur da nus / Consultaziuns / Consultaziuns currentas.


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail Martin.Jaeger@ekud.gr.ch
- dr. Hans Peter Märchy, manader da l'uffizi per la furmaziun media-superiura, tel. 081 257 61 65, e-mail Hans.Peter.Maerchy@ahb.gr.ch  


Gremi: regenza
Funtauna: rg chanzlia chantunala dal Grischun
Neuer Artikel