Zum Seiteninhalt

Communicaziun da la regenza dals 23 da november 2017

  • Erste Mitteilung
  • Neuen Beitrag einfügen
La regenza ha approvà la sanaziun da las gallarias da la via da Val S. Pieder, la renovaziun da la via dals Polacs al pass da Tumegl e l'engrondiment da la chava da crappa ad Andeer. Ultra da quai ha ella deliberà in sustegn finanzial per las mesiras d'urgenza a l'Ovel da Staz suenter las malauras a San Murezzan.

Las gallarias da la via da Val S. Pieder vegnan sanadas
La regenza ha approvà in project da vias per reparar la via da Val S. Pieder. Sco via chantunala da colliaziun dat la via da Val S. Pieder access a la Lumnezia sut ed a la Val S. Pieder. Las gallarias da la Val Renastga che tutgan tar il traject Glion – Mulin da Pitasch da la via da Val S. Pieder èn vegnidas construidas l'onn 1986. Il project prevesa da restaurar las gallarias per in'ulteriura durada d'utilisaziun da 50 fin 60 onns. I vegnan prendidas tut las mesiras da rinforzament e da renovaziun ch'èn necessarias per il mantegniment. La reparaziun vegn fatga senza ch'il traffic vegnia interrut. Ultra da quai prevesa il project d'extender il vial per 30 cm sin 7,25 m. Quai vegn realisà cun disfar il mir da sustegn da la vart da la muntogna e cun construir in nov mir davos da las gallarias. Ils custs totals da construcziun importan circa 9,4 milliuns francs.

-
©Hansjürg Gredig, ZHAW

La via dals Polacs al pass da Tumegl vegn renovada tranter Stussavgia e Val S. Pieder
Il project da construcziun per renovar la via dals Polacs al pass da Tumegl è vegnì approvà da la regenza. L'approvaziun vegn concedida cun resalva da las proceduras communalas per la permissiun da construcziun da las vischnancas da Stussavgia e Val S. Pieder participadas. Plinavant ha la regenza concedì ina contribuziun chantunala da maximalmain 178 434 francs.
La via sur il pass da Tumegl è vegnida construida durant la Segunda Guerra mundiala da Polacs internads. La vart da la Val S. Pieder è ussa part da l'inventari federal da las vias da communicaziun istoricas da la Svizra. La via ha ina gronda impurtanza turistica. Ella cumpiglia la ruta regiunala da viandar 35 (via gualsra) sco er la ruta naziunala da velo da muntogna 1 (alpine bike) e la ruta regiunala da velo da muntogna 90 (Grischun bike). Il stadi actual da la via na correspunda betg pli a questa impurtanza. Pervia da donns d'erosiun n'è la via betg agreabla ni d'inchaminar ni da far cun il velo da muntogna. Per meglierar duraivlamain quest stadi èsi necessari en differents lieus da modernisar l'allontanament da l'aua, da nivellar la surfatscha da la via e da segirar ils mirs da sustegn per evitar ulteriurs sbassaments. La primavaira 2018 èsi previs da cumenzar cun las lavurs da construcziun.

-
©Hansjürg Gredig, ZHAW

La chava da crappa ad Andeer po vegnir engrondida
La revisiun parziala da la planisaziun locala, concludida da la vischnanca d'Andeer ils 29 da mars 2017, è vegnida approvada da la regenza. Cun questa revisiun parziala stgaffescha la vischnanca d'Andeer las premissas per engrondir la chava da crappa existenta Cuolmet. Las reservas d'explotaziun da l'ortognais tschertgà "granit d'Andeer" d'actualmain var anc 80 000 meters cubic vegnan augmentadas da nov sin ca. 330 000 meters cubic. Per quest motiv vegn il territori d'explotaziun extendì vers nord (ensi vers la muntogna) e vers sid (fin al Rain posteriur). Durant e suenter l'explotaziun da 20 fin 25 onns vegnan la reemplenida e la recultivaziun da l'areal (incl. reforestaziun e construcziun d'in corridor per la selvaschina) fatgas cun quantitads anc betg enconuschentas da material nunsmerdà da stgavament, da demoliziun e da rumida.

-
© Uffizi federal da topografia

La pista che maina giu ad Arosa vegn schlargiada
La regenza ha approvà la revisiun parziala da la planisaziun locala dad Arosa, concludida da la vischnanca ils 27 da november 2016. La finamira è quella d'adattar la zona da sport d'enviern en il sectur da la pista che maina giu la val "Tschuggen ost". La pista correspundenta è ina da las sortidas principalas dal territori da skis. En la part sut è ella relativamain stretga e munta perquai – cunzunt per sportistas e sportists d'enviern senza experientscha – ina gronda ristga d'accidents. Perquai duai la pista vegnir schlargiada. Quai pretenda che 1453 meters quadrat da guaud vegnian runcads. Ultra da quai duai vegnir construida ina nova colliaziun da vias da skis (Vetter Traverse) en il territori "Seeegga".

Sustegn finanzial per San Murezzan suenter las malauras
La regenza ha deliberà contribuziuns finanzialas per las mesiras d'urgenza a l'Ovel da Staz suenter las malauras a San Murezzan. Al sustegn finanzial sa participeschan la confederaziun ed il chantun tenor la cunvegna da program "rempars d'auas". Dals custs totals da var 1,02 milliuns francs surpiglia la confederaziun maximalmain 357 000 francs ed il chantun maximalmain 204 000 francs.
La saira dals 30 da matg 2017 hai dà ina greva malaura cun temporals en Engiadin'ota. Questa malaura ha chaschunà in'aua gronda en l'Ovel da Staz. L'aual è creschì fitg ferm entaifer pauc temp. Abitadis, surfatschas da mastergn, vias, conducts d'ovra e terren cultivabel èn vegnids inundads da la massa d'aua e sutschlavads pervia da l'erosiun da l'aual. Per evitar donns consecutivs ha la vischnanca da San Murezzan cumenzà immediatamain cun las lavurs da reparaziun necessarias. Las parts da las construcziuns ch'eran donnegiadas èn vegnidas sustegnidas al lieu, reconstruidas e per part remplazzadas.

-
©Polizia chantunala dal Grischun


Gremi: regenza
Funtauna: rg chanzlia chantunala dal Grischun
Neuer Artikel