Navigation

Inhaltsbereich

Communicaziun da la regenza dals 11 da schaner 2018

  • Erste Mitteilung
  • Neuen Beitrag einfügen
La regenza ha prendì posiziun tar il pass previs d'engrondir l'infrastructura da viafier da la confederaziun. Ultra da quai ha ella dà l'incumbensa d'elavurar in concept per promover la cultura.

Engrondiment da l'infrastructura da viafier fin l'onn 2035 pli raschunaivel per il Grischun
La regenza ha prendì posiziun tar duas variantas da concept da la confederaziun concernent il pass d'engrondir l'infrastructura da viafier per l'onn 2030 u 2035. Il project dal departament federal per ambient, traffic, energia e communicaziun (DATEC) cuntegna la realisaziun da la politica da traffic da la confederaziun e dals chantuns ch'è vegnida instradada avant onns e sustegnida dal pievel cun gronda maioritad.
La regenza è persvadida che la varianta dal pass d'engrondiment 2030 examinada dal cussegl federal che ha in volumen d'investiziun da 7 milliardas francs na possia betg satisfar a l'augment dal traffic prognostitgà. La realisaziun da la varianta dal pass d'engrondiment 2035 cun in volumen d'investiziun dad 11,5 milliardas francs ha bain in orizont da temp in zic pli vast, garantescha però il medem mument ch'ina gronda part da las stretgas en Svizra po vegnir eliminada. Perquai preferescha la regenza grischuna, sco er il cussegl federal, la segunda varianta pervia da la meglra relaziun dals custs cun il niz sco er perquai che la gronda part da las stretgas existentas vegn eliminada.
En relaziun cun il dumber d'abitantas e d'abitants e cun la dumonda da transport prevesan tuttas duas variantas dal concept mo ina part fitg pitschna da las investiziuns per il chantun Grischun. Savend ch'in sistem general naziunal ferm vegn dentant a purtar in niz considerabel er per il chantun Grischun, po la regenza tuttina approvar la proposta dal cussegl federal. Però premetta la regenza che la realisaziun dals engrondiments previs en e per il Grischun vegnia garantida. Sche l'engrondiment da l'infrastructura da viafier na possia betg vegnir realisà sco planisà, vegnia limitada uschia la mobilitad da las generaziuns successivas. L'engrondiment da la viafier na persequitescha betg in'atgna finamira. La Svizra sco lieu economic dependa da colliaziuns da traffic fidadas ed attractivas. Il niz per l'economia publica è incontestà. La buna cuntanschibladad dals lieus da producziun e la qualitad da la mobilitad èn facturs impurtants e motivs centrals per il success economic dal Grischun e da tut la Svizra. Qua gioga la viafier ina rolla decisiva.

Documents da consultaziun DATEC

Il departament vegn incumbensà cun in concept per promover la cultura
La regenza ha incumbensà il departament d'educaziun, cultura e protecziun da l'ambient (DECA) d'elavurar in concept cumplessiv per promover la cultura. L'elavuraziun d'in concept per promover la cultura en il chantun Grischun è prescritta en la lescha davart la promoziun da la cultura dals 15 da favrer 2017 e vegn concludida correspundentamain mintga 4 onns dal cussegl grond. Cur ch'ils 4 onns èn mintgamai passads datti in'evaluaziun, da la quala ils resultats vegnan resguardads per il concept che sto vegnir elavurà da nov per la proxima perioda da 4 onns.
Resguardond ils secturs da la promoziun da la cultura ch'existan gia duai il concept per promover la cultura cuntegnair er quai ch'è gia avant maun. Il concept duai perquai represchentar la situaziun actuala da la promoziun da la cultura en il chantun Grischun. Ultra da quai duai il concept definir accents per la politica da promoziun sco er mussar vias e mesiras per cuntanscher las finamiras prendidas en mira (situaziun previsa). El è la basa per decisiuns da la politica culturala dal chantun.
Per l'elavuraziun vegnan nominadas ina gruppa da project ed ina gruppa accumpagnanta. La direcziun dal project surpiglia fin ils 31 da december 2018 cusseglier guvernativ Martin Jäger. Da la gruppa da project fan ultra da quai part la manadra da l'uffizi da cultura, Barbara Gabrielli, ina accumpagnadra dal project externa, Rita Schmid, sco er mintgamai duas represchentantas u dus represchentants da la cumissiun da cultura e d'organisaziuns chantunalas da cultura. En la gruppa accumpagnanta vegnan a far part represchentanzas da tut las instituziuns ed organisaziuns culturalas relevantas. Fin la fin da l'onn 2019 duai il concept vegnir deliberà da la regenza per mauns dal cussegl grond.

La colliaziun dals territoris da skis Mustér – Sedrun prenda il proxim obstachel
La regenza ha approvà la revisiun parziala da la planisaziun locala, ch'è vegnida concludida da la vischnanca da Mustér ils 24 da settember 2017. Cun questa approvaziun vegnan stgaffidas las premissas da la planisaziun dal territori per construir la teleferica da colliaziun da Sedrun sin il "Cuolm da Vi". La gronda part da la colliaziun sa chatta sin il territori da la vischnanca da Tujetsch. Sia planisaziun d'utilisaziun per quest project è gia vegnida approvada cun il conclus da la regenza dals 7 da november 2017.

communicaziun da la regenza dals 9 da november 2017

-
©Uffizi federal da topografia


Gremi: regenza
Funtauna: rg chanzlia chantunala dal Grischun
Neuer Artikel