Navigation

Inhaltsbereich

Communicaziun da la regenza dals 25 da schaner 2018

  • Erste Mitteilung
  • Neuen Beitrag einfügen
La regenza ha pussibilità da reglar sin via electronica midadas da chasa entaifer la Svizra. Plinavant ha ella acceptà l'invitaziun a la Fête des Vignerons a Vevey.

Midar chasa sin via electronica è prest er pussaivel en il Grischun
"eMidadaCH" è in project priorisà dad "e-government Svizra" che pussibilitescha a persunas cun domicil en Svizra da reglar sin via electronica lur midadas da chasa entaifer la Svizra. La partenza, l'arriv e la midada da chasa pon vegnir annunziads en in pass sur ina plattafurma da midada centrala en l'internet, independentamain da las uras d'avertura dals spurtegls. Ils emprims chantuns han gia introducì eMidada. Er la regenza dal chantun Grischun vul introducir svelt eMidada. Quai premetta tranter auter la collavuraziun dal chantun cun las vischnancas. Intginas vischnancas grischunas han mussà lur interess per eMidada, uschia er la citad da Cuira che vuless dar liber eMidada durant l'emprim quartal 2018. La regenza ha deliberà il project per l'introducziun dad eMidada per la realisaziun ed ha nominà sin plaun chantunal in'organisaziun da project che fa las lavurs preliminaras necessarias e che coordinescha l'introducziun en las vischnancas. Uschia vegnan stgaffidas las premissas per che las vischnancas possian introducir eMidada. La decisiun, sche e cura che eMidada vegn introducida, è chaussa da las vischnancas. Il manaschi da pilot cun las emprimas vischnancas vegn cumenzà durant l'emprim quartal 2018. Il process d'annunzia electronic vegn explitgà en il film "eMidadaCH – il process d'annunzia online".

Film ed ulteriuras infurmaziuns:
www.egovernment.ch

Il Grischun sco chantun ospitant a la Fête des Vignerons
Il chantun Grischun sa participescha sco chantun ospitant a la Fête des Vignerons. La festa da viticulturs cun sia lunga tradiziun ha lieu mo mintga 25 onns a Vevey e tutga dapi il december 2016 tar il patrimoni cultural immaterial da la UNESCO. Gia l'onn 1792 èn sa radunads ils possessurs da vignas dal Vad per premiar publicamain lur megliers vins. Dapi il 19. tschientaner è la festa da viticulturs a Vevey ina gronda festa populara. Sin ina tribuna al liber preschentan 5000 acturas ed acturs in toc da teater ch'è vegnì producì da poetessas e poets, da musicistas e musicists sco er da choreografas e choreografs. Per las totalmain 20 represchentaziuns vegnan mintgamai spetgads 20 000 aspectaturas ed aspectaturs che pajan entrada. Parallelamain ha lieu ina festa da la citad libramain accessibla che attira mintga di bundant 40 000 visitadras e visitaders.
La proxima festa è dals 18 da fanadur fin ils 11 d'avust 2019. Il chantun Grischun profita da l'occasiun da sa preschentar durant ils dis chantunals cun sia diversitad culturala e linguistica sco er cun sias cuntradas multifaras.

Ulteriuras infurmaziuns davart la Fête des Vignerons:
www.fetedesvignerons.ch
www.lebendigetraditionen.ch

-
©Philippe Pache, Confrérie des vignerons


Gremi: regenza
Funtauna: rg chanzlia chantunala dal Grischun
Neuer Artikel