Navigation

Inhaltsbereich

Il project victur per la renovaziun dal center da dietas Plantahof è eruì

  • Erste Mitteilung
  • Neuen Beitrag einfügen
A la cuminanza da lavur Nickisch Walder, architects, Flem, e Planalytik ScRL, Flums, vegnan surdadas las lavurs per planisar e per renovar il center da dietas dal CFCA Plantahof a Landquart.

Il center da furmaziun e cussegliaziun agricula Plantahof a Landquart (CFCA Plantahof) è – sco institut agricul – ina instituziun d'impurtanza surregiunala. Ultra dal manaschi agricul e da la scolaziun e da la furmaziun supplementara èn er la perscrutaziun d'allevament e la cussegliaziun champs d'activitad impurtants dal CFCA Plantahof. Grazia a quests champs d'activitad è il CFCA Plantahof er sa sviluppà ad in center da dietas impurtant.

Ulteriur svilup tenor in plan da basa
L'areal dal CFCA Plantahof è creschì durant blers decennis e cumpiglia oz circa 20 edifizis. Per sclerir differents ulteriurs svilups dal manaschi e da l'architectura dal CFCA Plantahof è vegnì fatg l'onn 2008 in plan da basa, tenor il qual ils futurs projects da construcziun ston vegnir orientads ad ina idea generala, e tenor il qual l'identitad da l'entir cumplex duai vegnir rinforzada. Cun l'avertura da l'auditori Weber l'onn 2011 e cun l'entrada en funcziun da la nova stalla da muvel grond l'onn 2014 èn vegnidas realisadas duas ovras sin fundament da quest plan da basa.

Grond basegn da renovaziun
Actualmain exista in basegn da renovaziun considerabel tar la chasa da scola, tar l'alloschi da las emprendistas e dals emprendists (convict), tar la sala da mangiar sco er tar la cuschina. Particularmain la sala da mangiar e la cuschina èn indrizs centrals dal CFCA Plantahof en sia funcziun sco center da dietas. La reparaziun necessaria da quests edifizis è ina gronda schanza per eliminar l'entretschament dal manaschi creschì durant ils onns e per part dischavantagius, e per dar ina identitad a l'instituziun en sia totalitad. In'ulteriura finamira è quella da realisar ils basegns dals utilisaders futurs. Per renovar il center da dietas (senza la chasa da scola) dal CFCA Plantahof è vegnida publitgada ina concurrenza da projects selectiva.

L'edifizi duai avair in aspect unitar
La finamira da la concurrenza da projects selectiva è stada quella d'evaluar in biro d'architectura ch'è qualifitgà da sviluppar in project che resguarda l'architectura locala, che persvada areguard sia funcziun e ch'è energeticamain util. Plinavant duai il project vegnir realisà en la qualitad giavischada sco er observar las prescripziuns pertutgant ils custs ed ils termins. In punct central dal program da concurrenza è stà quel da mantegnair ina diversitad d'ideas uschè vasta sco pussaivel. Cunzunt er areguard la soluziun pertutgant l'architectura locala e l'aspect unitar da l'edifizi cumbinà cun quai.

"FLORA" è sa profilada
Da 31 candidaturas èn vegnidas tschernidas 12 per l'elavuraziun d'in project proponì. Ils projects da concurrenza èn vegnids valitads en furma anonima. La giuria è sa decidida per il project cun il pled-clav "FLORA" da la cuminanza da lavur Nickisch Walder, architects, Flem, e Planalytik ScRL, Flums.
Il project "FLORA" sa distingua pervia da ses cubus simpels che mainan quietezza ed in bun urden en l'areal creschì, e quai grazia ad in concept persvadent per l'architectura locala. Ils auturs dal project han persvadì la giuria cun lur idea che na meglierescha betg mo cleramain l'adressa dal Plantahof, mabain ch'ordinescha en moda precisa e cun auta qualitad e structurescha duraivlamain ils spazis exteriurs ed intermediars da l'institut.

Ulteriur proceder
Cun il consentiment da la regenza vegn il project sviluppà vinavant ed i vegn elavurada ina missiva per mauns dal cussegl grond. Il conclus è suttamess al referendum obligatoric. La planisaziun da construcziun e la realisaziun èn previsas per l'onn 2019. Ils projects proponids èn exponids en il foyer da la sala dals allevaturs (tract da la chasa da scola) tar il CFCA Plantahof a Landquart da venderdi, ils 2 fin mesemna, ils 14 da favrer 2018. L'exposiziun è accessibla mintgamai durant ils lavurdis da las 07.30 fin las 17.00.


Agiuntas:
rapport da la giuria

-   -


Infurmaziuns:
- president da la regenza dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch
- Markus Dünner, architect chantunal, uffizi da construcziun auta, tel. 081 257 36 31, e-mail Markus.Duenner@hba.gr.ch


Gremi: uffizi da construcziun auta dal Grischun
Funtauna: uffizi da construcziun auta dal Grischun
Neuer Artikel