Navigation

Inhaltsbereich

La situaziun tar la ats fa quitads a la regenza

  • Erste Mitteilung
  • Neuen Beitrag einfügen
Cun preoccupaziun prenda la regenza enconuschientscha da las mesiras da reorganisaziun respectivamain da la reducziun da plazzas planisada da l'agentura telegrafica svizra ats. Perquai drizza ella ina brev a la direcziun generala da la ats.

En questa brev exprima la regenza ch'ella saja preoccupada pervia da las midadas impurtantas tar la ats. Ultra da quai accentuescha ella sia aspectativa da resguardar tar la realisaziun da las mesiras da restructuraziun ils basegns spezials da la Svizra plurilingua e dal chantun Grischun triling.

Coesiun tranter las regiuns da la Svizra
La ats è oz l'unica agentura da novitads naziunala da la Svizra. Ella survegn – en il mund medial che sa mida adina pli svelt en noss pajais – ina incumbensa da coesiun impurtanta tranter las regiuns e las cuminanzas linguisticas. En il territori rural èn las medias dependentas anc pli fitg ch'en ils centers urbans da la transmissiun cumplessiva, regulara e fundada da novitads e da commentaris da la ats.

Dal Grischun per la Svizra
Adina pli paucas medias pon sa prestar ozendi in'atgna rait da correspundentas e da correspundents en tut la Svizra. Per il Grischun èsi perquai spezialmain impurtant che la redacziun regiunala Grischun-Glaruna-FL da la ats, cun sedia a Cuira, rapportescha cuntinuadamain dals eveniments en noss chantun per mauns da tut las medias svizras. D'impurtanza speziala èn ils servetschs da la ats er per la Svizra taliana. Ils rapports davart la politica federala sco er da las differentas regiuns linguisticas èn fitg impurtants per la chapientscha culturala vicendaivla tranter las regiuns. Per la transmissiun d'infurmaziuns entaifer il Grischun è er la nova purschida da la ats en lingua taliana cun in'atgna collavuratura a Cuira fitg preziusa.


Gremi: regenza
Funtauna: rg chanzlia chantunala dal Grischun
Neuer Artikel