Navigation

Inhaltsbereich

  • Erste Mitteilung
  • Neuen Beitrag einfügen
Dapi l'onn 2017 elavura l'administraziun da taglia dal Grischun las decleraziuns da taglia da las persunas natiralas en furma electronica. In nov video da la chanzlia chantunala mussa als pajataglias, co ch'els pon gidar ad optimar l'andament.

L'onn 2017 han 24 000 pajataglias inoltrà la decleraziun da taglia sin via electronica. Quai è ina part da 20 pertschient da tut ils pajataglias primars. Igl è vegnì constatà che blers pajataglias n'inoltreschan per exempel betg il fegl da quittanza. Quel è però stringentamain necessari per che la decleraziun da taglia valia sco inoltrada.

Er vegnan anc fitg blers documents fermads cun agraffas u cun bostitchs ubain tramess en furma liada al center d'elavuraziun a Cuira. Tals documents ston alura vegnir preparads per scannar. Quai chaschuna retardaments en il process d'elavuraziun ed ha consequenzas fin a l'examinaziun immediata dals documents.

L'experientscha ha mussà che la lavur administrativa po vegnir reducida, sch'ils pajataglias observan intginas paucas reglas fundamentalas per inoltrar la decleraziun da taglia. En il mussavia per la decleraziun da taglia vegni renvià ad in pèr puncts per inoltrar la decleraziun da taglia.

Il nov film d'animaziun curt ed infurmativ da la chanzlia chantunala dal Grischun duai cuntanscher anc dapli pajataglias. Il video pon ins guardar a partir d'immediat sin la pagina d'internet da l'administraziun chantunala da taglia (www.stv.gr.ch) e sin il chanal chantunal da Youtube.


Infurmaziuns:
dr. iur. Toni Hess, schef dal servetsch giuridic tar l'administraziun da taglia, tel. 081 257 33 26, e-mail Toni.Hess@stv.gr.ch
Neuer Artikel

Inoltrar la decleraziun da taglia sin via electronica