Navigation

Inhaltsbereich

Communicaziun da la regenza dals 22 da favrer 2018

  • Erste Mitteilung
  • Neuen Beitrag einfügen
La regenza ha concludì da metter en vigur la lescha da vischnancas per il 1. da fanadur 2018. Ultra da quai ha ella dà glisch verda per la correcziun da la via da Val Stussavgia.

Entrada en vigur da la lescha da vischnancas
Durant la sessiun d'october 2017 ha il cussegl grond concludì ina revisiun totala da la lescha da vischnancas dal chantun Grischun. La lescha da vischnancas è il relasch general per che las vischnancas possian organisar en moda optimala l'adempliment da lur incumbensas. I n'è vegnì fatg nagin referendum cunter la revisiun totala, uschia che la regenza ha concludì da metter en vigur la nova lescha da vischnancas per il 1. da fanadur 2018. Ella remplazza la lescha vertenta ch'è en vigur dapi l'onn 1974.
Il medem mument ston vegnir adattadas trais ordinaziuns da la regenza che renvieschan a la lescha. Perquai ha la regenza concludì las revisiuns parzialas da l'ordinaziun davart il stadi civil, da l'ordinaziun davart la delegaziun da cumpetenzas da la regenza als departaments ed als posts da servetsch sco er da l'ordinaziun davart la surveglianza da las finanzas da las vischnancas.

La via da Val Stussavgia po vegnir schlargiada
La regenza ha approvà il project per la correcziun da la via da Val Stussavgia, traject Treuschtobel, cun permissiuns spezialas e cundiziuns. Il traject da via da circa 400 meters lunghezza tranter Neukirch e Rinmatta duai vegnir schlargià al standard fixà da 4,2 meters. Questa correcziun da la via è urgentamain necessaria per ina avertura confurma al temp da la Val Stussavgia, pervia da l'augment dal traffic, pervia dal mantegniment da la via e la finala per motivs da la segirezza dal traffic.
La punt Treuschtobel na fa betg part dal project. Quella è vegnida renovada gia l'onn passà. Ils custs per la correcziun da la via importan circa 3,5 milliuns francs.

-  -

Las installaziuns d'art al chastè da Tarasp èn confurmas a la zona
La regenza ha approvà ina revisiun parziala da la planisaziun locala, concludida da la vischnanca da Scuol ils 26 da mars 2017. En il center da questa revisiun da la planisaziun locala stat il chastè da Tarasp. Quel duai vegnir duvrà en il futur sco center cultural da scuntradas e d'exposiziuns per art figurativ e per musica. A medem temp duai el però er restar accessibel per la publicitad sco lieu istoric-cultural. La vischnanca da Scuol, la "Fundaziun Chastè da Tarasp" sco er il proprietari dal chastè da Tarasp han fatg ina cunvegna per quest intent. Tenor quella sustegna tranter auter la vischnanca da Scuol la "Fundaziun Chastè da Tarasp" fin la fin da l'onn 2030 cun contribuziuns da gestiun. Percunter vegni garantì ch'il chastè restia avert per il public.
La revisiun parziala da la planisaziun locala approvada cuntegna en il sectur dal chastè da Tarasp cumplettaziuns correspundentas che resguardan ils giavischs da protecziun e d'utilisaziun menziunads. Igl è pia permess da plazzar singulas installaziuns d'art e sculpturas sco er da construir ils edifizis e stabiliments necessaris entaifer la zona periferica dal chastè.

-
©Comet Photoshopping ScRL/ Dieter Enz

Contribuziun da construcziun per sanar la chasa d'emprendistas e d'emprendists da l'Engiadin'ota a Samedan
La regenza ha approvà il project da sanaziun per renovar e per sanar il plaunterren ed il plaun sutterran da la chasa d'emprendistas e d'emprendists da l'Engiadin'ota a Samedan. A l'associaziun per la chasa d'emprendistas e d'emprendists da l'Engiadin'ota vegn garantida ina contribuziun da construcziun da maximalmain 276 000 francs.
La chasa d'emprendistas e d'emprendists porscha a las emprendistas ed als emprendists ina purschida d'abitar assistida cun alimentaziun. La chasa ha 32 chombras singulas e 16 chombras dublas sco er locals per concepir il temp liber. Ultra da quai stattan a disposiziun in studio per ina collavuratura u in collavuratur sco er in'abitaziun da servetsch per la direcziun da la chasa. Las sanaziuns planisadas cumpiglian primarmain il plaunterren e parts dal plaun sutterran. La gronda part da las differentas mesiras architectonicas èn lavurs da renovaziun e da mantegniment. Suenter la sanaziun duai l'edifizi avair in'apparientscha pli moderna che correspunda meglier als basegns. Quai duai gidar a pudair cuntanscher er en l'avegnir ina buna occupaziun. Plinavant vegnan garantids cun las lavurs da sanaziun e da renovaziun la substanza architectonica ed il mantegniment da la valur da l'object.

-
©Chesa da giarsuns d'Engiadin'ota


Gremi: regenza
Funtauna: rg chanzlia chantunala dal Grischun
Neuer Artikel