Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna ha nominà Lorenz Tanner sco nov manader da l'uffizi chantunal d'informatica. El vegn a surpigliar questa funcziun il 1. da settember 2018.

La regenza grischuna ha elegì Lorenz Tanner da Maiavilla, che ha 47 onns e ch'è spezialist diplomà da l'informatica economica, sco nov manader da l'uffizi d'informatica dal chantun Grischun.

Lorenz Tanner arriva da l'economia privata en l'administraziun chantunala. Quasi 30 onns ha el lavurà cun success per ina banca gronda svizra en differentas posiziuns en il sectur da l'informatica. El ha enconuschientschas fundadas en il sectur da l'informatica sco er experientscha da project e da direcziun da blers onns. El abita a Cuira. Lorenz Tanner daventa successur da Werner Danuser che va en pensiun per la fin d'avust 2018 suenter ses engaschament da 18 onns sco manader da l'uffizi.

L'uffizi d'informatica è il gestiunari d'informatica central da l'administraziun chantunala e l'instanza centrala per l'acquisiziun da meds e da servetschs d'informatica. Las incumbensas principalas da l'uffizi cumpiglian ils secturs planisaziun, cussegliaziun, cumpra, support ICT, applicaziuns, center da computers, servetschs da server, rait e telefonia sco er gestiun e segirezza da l'informatica.

L'uffizi d'informatica è suttamess al departament da finanzas e vischnancas.

Fotografia agiuntada:
-
Lorenz Tanner


Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail Barbara.Janom@dfg.gr.ch  


Gremi: regenza
Funtauna: rg chanzlia chantunala dal Grischun
Neuer Artikel