La regenza ha approvà in project da cumpensaziun reala e da protecziun da la natira da la vischnanca da Trimmis. Plinavant ha ella dà glisch verda per in lieu da scola da la ibW a Ziegelbrücke e per la construcziun da plazzas da fermada a la via da Malögia.
Nova cuntrada da puzs cun guaud sco cumpensaziun per runcadas en la Val dal Rain grischuna
La regenza ha approvà l'emprim project da cumpensaziun reala per surfatschas da guaud en la Val dal Rain grischuna. Sin ina surfatscha da circa 4,5 hectaras duai vegnir stgaffì guaud, ma er in areal da protecziun da la natira en il territori da las zonas umidas dal Rain a Trimmis. Il concept da furmaziun prevesa da reemplenir il lai d'exchavaziun e da furmar lura ina cuntrada da puzs sco er in guaud tipic per zonas umidas. Tras l'autezza d'emplenida tschernida èsi pussaivel da garantir la colliaziun dals puzs cun l'aua sutterrana, uschia ch'i pon resultar auas da fregar per amfibis protegids e fitg periclitads. Tras il project da cumpensaziun reala po vegnir augmentada la valur ecologica dal territori, ed a medem temp vegn prestada la cumpensaziun reala necessaria per runcadas. Per petentas e petents èsi fitg difficil da chattar sut squitsch da temp surfatschas per emplantaziuns cumpensatoricas en il fund da la val che vegn tratg a niz en moda intensiva.
In ulteriur element dal project è in'utilisaziun natirala da l'areal per il temp liber. La part centrala è in lai d'ina surfatscha da circa 0,9 hectaras en il sectur sidost dal territori dal project. Quest lai ha ina profunditad maximala da circa 10 meters e po vegnir utilisà per far bogn e per pestgar. La concepziun finala da las zonas umidas dal Rain dastgass esser realisada previsiblamain il pli baud l'onn 2023. Il project è budgetà cun custs totals da circa 2,65 milliuns francs.
Charta: ©Uffizi federal da topografia
Glisch verda per in lieu da scola da la ibW a Ziegelbrücke
La regenza sustegna l'intenziun da la scola spezialisada superiura da la Svizra sidorientala (ibW) d'installar in lieu da scola a Ziegelbrücke en il chantun Glaruna. Tenor il contract general 2017–2020 tranter la ibW ed il chantun Grischun po la ibW manar purschidas en ulteriurs lieus. Purschidas da scolaziun extrachantunalas dovran dentant il consentiment da la regenza grischuna. En enclegientscha cun la regenza dal chantun Glaruna ha la ibW perquai dumandà da pudair porscher scolaziuns en il sectur da la furmaziun professiunala superiura al lieu da scola Ziegelbrücke. La strategia da la ibW è quella da coordinar las purschidas en l'intschess uschè optimalmain sco pussaivel ina cun l'autra e dad esser represchentada cun atgnas localitads da scola en lieus strategicamain impurtants en il territori da la Svizra sidorientala. Sin fundament da questa orientaziun strategica pon vegnir purschidas – cun il consentiment da la regenza grischuna – dapi l'onn chalendar 2012 scolaziuns da la ibW a Sargans en collavuraziun cun il center per furmaziun professiunala supplementara Son Gagl (ZbW). Bleras studentas e blers students da la regiun Glaruna–Linth frequentan las scolaziuns a Cuira ed a Sargans, perquai ch'i mancan purschidas da scolaziun correspundentas en lur regiun d'origin. En il center da la purschida da scolaziun planisada stat perquai l'utilisaziun da las localitads da scola da la scola professiunala spezialisada da mastergn e d'industria dal chantun Glaruna a Ziegelbrücke.
Approvaziun da las plazzas da fermada a la via da Malögia a l'ur da Silvaplauna
La regenza ha approvà il project per construir las plazzas da fermada a la via da Malögia ordaifer il vitg da Silvaplauna. L'approvaziun è vegnida concedida cun resalva da la procedura da permissiun da la vischnanca. Plinavant ha la regenza concedì ina contribuziun chantunala da maximalmain 310 207 francs tenor la lescha davart las vias sco er ina contribuziun da maximalmain 248 028 francs tenor la lescha davart il traffic public.
Quest project prevesa da construir plazzas da fermada per il traffic public da tuttas duas varts da la via en il territori "Mulets" en la vischinanza dal campadi da Silvaplauna. Cun la construcziun da las plazzas da fermada pon ils bus fermar sper il vial, uschia ch'il traffic po circular senza disturbis sin la via chantunala e las passagieras ed ils passagiers pon entrar e sortir senza privel.
©sg-visual
Augment dals pais maximals permess sin diversas vias chantunalas
Suenter che la construcziun e la renovaziun da vias chantunalas da colliaziun en il district Tusaun èn terminadas, vegnan fixads da nov ils pais maximals permess e la ladezza maximala. Sin la via da Roten, sin la via da la Tumleastga e sin la via d'Almen vala da nov in pais maximal da 32 tonnas sin ils trajects curregids. Sin la via da Stierva, tranter la punt Mulegn fin a l'entrada dal vitg da Stierva, poi vegnir charrà da nov cun 32 tonnas. Ultra da quai vegn abolida la limitaziun da la ladezza maximala da 2,3 meters sin quest traject. Davent da l'entrada dal vitg da Stierva fin a la fin da questa via chantunala vala da nov in pais maximal da 18 tonnas. Sin quest traject vala er vinavant la ladezza maximala da 2,3 meters. Questas mesiras entran en vigur cun l'adattaziun da la signalisaziun correspundenta.
Sin la via da Stierva poi vegnir charrà da nov cun 32 tonnas fin a l'entrada dal vitg
©Uffizi federal da topografia
Gremi: regenza
Funtauna: rg chanzlia chantunala dal Grischun