Navigation

Inhaltsbereich

Communicaziun da la regenza dals 12 d'avrigl 2018

  • Erste Mitteilung
  • Neuen Beitrag einfügen
La regenza ha prendì posiziun tar las propostas per midar la procedura penala. Ultra da quai ha ella preschentà al cussegl grond ina contribuziun chantunala per il terminal da bus a Glion ed ha approvà in grond project d'avertura dal guaud a Domat.

Cudesch da procedura penala: Posiziun da la regenza
La regenza ha prendì posiziun tar il project da consultaziun dal departament federal da giustia e polizia (DFGP) concernent la midada da la procedura penala. Tras midadas da tscherts puncts vul il project meglierar la praticabilitad da la procedura penala. Per evitar che persunas inculpadas possian sa cunvegnir ina cun l'autra, vegnan restrenschids moderadamain ils dretgs da participaziun tras la revisiun. Ultra da quai vuless il cussegl federal rinforzar la posiziun da las victimas d'acts chastiabels.
La regenza è da l'opiniun che numerusas propostas dal project avant maun prolungheschian e rendian pli charas las proceduras, senza ch'in basegn d'agir stringent fiss cumprovà. Pertutgadas èn en quest connex oravant tut las disposiziuns concernent la defensiun necessaria ed uffiziala, ils dretgs da participaziun sco er las proceduras da mandats penals.
A la regenza statti ultra da quai a cor da mantegnair ils interess da victimas d'acts chastiabels. En las disposiziuns en discussiun vegnan però proponidas differentas midadas che chaschunan tendenzialmain ina prolungaziun da las proceduras. Quai n'è betg en il senn da las victimas. Perquai refusa la regenza questas midadas previsas. Plinavant surpiglia la regenza grischuna cumplainamain la posiziun da la conferenza da las directuras e dals directurs chantunals da giustia e polizia (CDCGP).

Posiziun da la conferenza da las directuras e dals directurs chantunals da giustia e polizia

La regenza suttametta al cussegl grond ina contribuziun chantunala per il terminal da bus a Glion
La regenza ha renconuschì la construcziun d'in nov terminal da bus a Glion sco mesira subvenziunabla per promover il traffic public. En il rom da la missiva tar il quint annual 2017 ha ella suttamess al cussegl grond in credit d'impegn per ina contribuziun chantunala en l'autezza da maximalmain 3,95 milliuns francs per l'approvaziun. La staziun da Glion è in punct central da traffic tranter la viafier ed il bus.
En in process da plirs onns han la vischnanca da Glion e la Viafier retica elavurà ina soluziun cuminaivla per renovar la staziun da Glion. Actualmain renovescha la Viafier retica cumplettamain la staziun. Sco part dal concept da surbajegiada èsi er previs da construir in nov terminal da bus cun ina nova via d'access. Sche quai vegn realisà a medem temp sco ils stabiliments da la viafier, che vegnan actualmain transfurmads, resultan sinergias. Elements centrals dal project èn il nov terminal da bus, ina nova via d'access, in stabiliment da park & ride sco er la nova concepziun da l'areal da la staziun. La regenza renconuscha il basegn da la vischnanca Glion e da la regiun per in terminal da bus cun ina concepziun moderna. La vischnanca da Glion è sco center regiunal da la Surselva in punct central da traffic tranter la viafier ed il bus. Da quest punct central da traffic anora van 11 lingias d'auto da posta en Surselva. Il cussegl grond vegn a tractar questa fatschenta en la sessiun da zercladur 2018. Il credit d'impegn sto vegnir suttamess al referendum da finanzas facultativ.

-

L'avertura dal guaud a Domat po vegnir realisada
Il project "Avertura dal guaud a Domat – zona da muntogna ost" da la vischnanca da Domat è vegnì approvà da la regenza. Per quest project ha ella er concedì ina contribuziun da maximalmain 4,9 milliuns francs. Il project cuntegna la construcziun da las suandantas vias da guaud charrablas cun camiuns: Culms Bels, Zeus, colliaziun cun Veulden e Val Aulta. Tut en tut ha la via ina lunghezza da circa 9,4 kilometers, da quels èn 8,8 kilometers vias existentas che vegnan renovadas e circa 550 meters èn vias che vegnan construidas da nov. Las vias da guaud vegnan schlargiadas ad ina ladezza fixa dal vial da 3,3 meters. Tut en tut custa il project circa 7,7 milliuns francs.

- -

Project da protecziun cunter crudada da crappa sin la lingia da l'Alvra
La regenza ha dà glisch verda al project da protecziun cunter crudada da crappa "Schmelziwald" da la Viafier retica (VR). Ultra da quai ha ella garantì ina contribuziun da maximalmain 3,5 milliuns francs. A divers lieus è la lingia da l'Alvra da la VR periclitada da lavinas e da crudada da crappa. Quai vala er per il territori "Schmelziwald" tranter Filisur e Bravuogn. Là vegn la lingia da viafier protegida cun mirs, cun rempars e cun palisadas cunter crudada da crappa e da blocs. Quests stabiliments èn gia blers onns en funcziun ed èn per gronda part en in nausch stadi.
Il project avant maun ha la finamira da garantir la protecziun da la lingia da l'Alvra. Per quai vegn il territori segirà cun raits cunter crudada da crappa da var 900 meters lunghezza. Ultra da quai vegnan renovads sis rempars existents. Ils custs da quest project vegnan budgetads cun totalmain 4,7 milliuns francs. Il project vegn realisà en quatter etappas da construcziun e duai esser terminà l'onn 2021.

- -

Megliers rempars per in torrent a Tavau
La regenza ha approvà in project per construir rempars per il torrent Stützbach da la vischnanca da Tavau. Als custs da 950 000 francs per il project sa participeschan la confederaziun ed il chantun tenor la cunvegna da program "Ovras da protecziun cunter l'aua". Daratgas intensivas da l'onn 2015 han scuvrì deficits da segirezza tar dus trajects dal torrent. Quests deficits vegnan ussa eliminads cun quest project. Pertutgads è d'ina vart in traject stretg da la chavorgia tranter Ober Laret ed Unter Laret e da l'autra vart il traject dal torrent che suonda sin tal e che traversa il territori d'Unter Laret.
Tar l'emprim traject sa tracti en emprima lingia da cumbatter cunter l'erosiun da la riva sanestra. Perquai dovri in'adattaziun dal terren ed ina segirada intensiva dal rempar da la riva. Tar il segund traject è la finamira dal project primarmain quella da deviar auas grondas entaifer il letg dal torrent senza ch'i dettia donns vi dals conturns. Per quest intent vegn construì in rempar da terra d'ina lunghezza da ca. 300 meters per lung da la riva sanestra.

-

Via da guaud a Preda po vegnir engrondida
La regenza ha approvà il project "Engrondiment da la via dal Got Lavizun" da la vischnanca da Bravuogn Filisur ed ha deliberà per quai ina contribuziun da circa 100 000 francs. Il Got Lavizun sa chatta da la vart sanestra da la Val d'Alvra a Preda directamain tar il portal dal tunnel da viafier da l'Alvra. Quest guaud protegia d'ina vart la lingia da la Viafier retica ed ademplescha ina funcziun impurtanta per la racolta da laina. Areguard la ladezza ed areguard la capacitad da chargia na correspunda la via simpla da terra existenta betg pli a las pretensiuns dad oz. Uschia chaschunan la racolta ed il transport da laina gronds custs e n'èn betg pli rentabels. Grazia a quest project po il guaud vegnir tgirà e regiuvinà en moda pli efficazia en l'avegnir.

-

La chasa d'abitar da l'internat da scola da Flem vegn sanada
La regenza ha approvà in project per sanar la chasa d'abitar existenta da l'internat da scola da Flem. Ultra da quai ha ella garantì a la purtadra, la fundaziun "Zürcher Kinder- und Jugendheime (zkj)", ina contribuziun chantunala da construcziun da maximalmain 1 milliun francs. L'internat da scola da Flem maina ina scolaziun speziala separativa e tgira tut en tut 16 scolaras e scolars en la vegliadetgna tranter 7 e 12 onns (stgalim primar) che han in cumportament extraordinari sco er supplementarmain disturbis d'emprender.
Suenter che la renovaziun e l'engrondiment da l'edifizi da scola èn vegnids instradads, ha la purtadra analisà ussa er il stadi architectonic da la chasa d'abitar. En quest connex è vegnida constatada ina chargia da radon memia gronda en il plaun sutterran. L'analisa da las substanzas da construcziun ha mussà che differentas parts da l'edifizi cuntegnan singulas substanzas nuschaivlas. Las mesiras necessarias vegnan realisadas en connex cun las lavurs da sanaziun planisadas. Ensemen cun las lavurs da mantegniment e da renovaziun èsi planisà da far er meglieraziuns ed optimaziuns energeticas. Plinavant èsi previs da remplazzar il stgaudament antiquà sco er parts dals indrizs sanitars.

Sustegn finanzial per il project "Atelier d'abitar a Vienna"
Il project cultural "Atelier d'abitar a Vienna" vegn sustegnì per trais ulteriurs onns. La regenza conceda ina contribuziun finanziala da totalmain 150 000 francs per ils onns 2018 fin 2021. Il project permetta ad artistas ed artists professiunals dal Grischun d'absolver ina dimora da tschintg mais en in atelier a Vienna. Per quest intent metta il chantun Grischun a disposiziun gratuitamain in atelier d'abitar e conceda in pajament supplementar als custs da viver. Il termin d'annunzia per l'onn 2019 curra anc fin venderdi, ils 8 da zercladur 2018.

Ulteriuras infurmaziuns tar il "Atelier d'abitar a Vienna"

-
©Evelina Cajacob

L'administraziun sa participescha a l'acziun "Bike to Work 2018"
L'administraziun chantunala sa participescha l'onn 2018 danovamain a l'acziun "Bike to Work" da la Pro velo Svizra. La regenza ha surdà l'organisaziun a l'uffizi da sanadad. En il rom da questa acziun vegnan las collavuraturas ed ils collavuraturs envidads da sa participar ad in'equipa da quatter e da prender il velo per ir a lavurar, e quai durant almain la mesadad dals dis da lavur dal mais da zercladur. Pussaivla è er ina cumbinaziun da traffic public e velo. Dapi l'onn 2010 è l'administraziun chantunala dal Grischun sa participada mintga onn a questa acziun. Il dumber da participantas e participants e las distanzas percurridas èn s'augmentads cuntinuadamain onn per onn: il 2017 han 375 emploiadas ed emploiads chantunals en 96 teams fatg totalmain 54 331 kilometers – en media 145 kilometers per persuna.


Gremi: regenza
Funtauna: rg chanzlia chantunala dal Grischun
Neuer Artikel