Navigation

Inhaltsbereich

Il Grischun duai daventar il center da la cultura alpina da giudiment

  • Erste Mitteilung
  • Neuen Beitrag einfügen
Il program da plirs onns "graubündenVIVA – daletg da las muntognas" po ussa vegnir realisà. La regenza ha concedì contribuziuns finanzialas en il rom da la nova politica regiunala (NPR). La finamira è quella da posiziunar e da rinforzar il Grischun sco lieu agricul ed economic cun agid dal tema "nutriment e culinarica".

La regenza ha concedì a l'uniun graubündenVIVA ina contribuziun da maximalmain 4,73 milliuns francs en il rom da la nova politica regiunala (NPR). La mesadad da questa contribuziun deriva da la confederaziun. Per realisar il program èn budgetads custs totals da circa 17,5 milliuns francs.
Daletg autentic e nutriment conscient èn megatrends globals. Cun posiziunar il Grischun sco center da la cultura alpina da giudiment vul l'uniun graubündenVIVA augmentar las svieutas e la creaziun da valurs en il turissem ed en l'agricultura. Las activitads da graubündenVIVA n'èn betg mo concepidas per ils giasts, mabain gidan er a rinforzar la conscienza da las persunas indigenas per l'impurtanza da products regiunals e da potenzials turistics.

Las emprimas activitads èn gia en preparaziun

Ils ultims 2 onns èn gia vegnidas prestadas lavurs preliminaras voluminusas per incumbensa dal chantun. Las basas ch'èn ussa avant maun mussan, co ch'ils partenaris economics, las federaziuns e las organisaziuns pon vegnir integrads en la realisaziun sustegnida vastamain e pon gidar a finanziar las activitads cuminaivlas. Er vinavant è previsa ina stretga collavuraziun cun alpinaVERA e cun Grischun vacanzas.
Gia ils proxims mais duain vegnir realisads emprims formats da graubündenVIVA. Sco punct culminant dal program duain lura avair lieu dal matg 2019 fin l'october 2020 numerusas activitads en tschintg spazis da divertiment da tut il chantun Grischun.


Infurmaziuns:
cusseglier guvernativ dr. Jon Domenic Parolini, schef dal departament d'economia publica e fatgs socials, tel. 081 257 23 01, e-mail Jondomenic.Parolini@dvs.gr.ch


Gremi: regenza
Funtauna: rg chanzlia chantunala
Neuer Artikel