Navigation

Inhaltsbereich

Communicaziun da la regenza dals 24 da matg 2018

  • Erste Mitteilung
  • Neuen Beitrag einfügen
La regenza ha prendì posiziun tar la midada da l'ordinaziun davart ils agens meds (OAMR) ed ha approvà ina contribuziun chantunala per engrondir l'indriz da far naiv al Rinerhorn.

La regenza ha prendì posiziun tar la midada da l'ordinaziun davart ils agens meds

La regenza ha prendì posiziun tar ina midada da l'ordinaziun federala davart ils agens meds (OAMR). En il center da la revisiun stattan uschenumnadas pretensiuns da chapital "gone concern" per las trais bancas svizras ch'èn relevantas per il sistem, ma betg activas sin plaun internaziunal (PostFinance, Raiffeisen e Banca chantunala turitgaisa). La regenza beneventa che las bancas relevantas per il sistem ch'èn orientadas a l'interiur vegnan tractadas – tras las disposiziuns previsas – en autra moda che las bancas grondas relevantas per il sistem ch'èn activas sin plaun internaziunal, e plinavant va la regenza d'accord ch'ils instituts betg relevants per il sistem, sco la Banca chantunala grischuna, vegnan exclus da questas pretensiuns da chapital. La regulaziun tegna uschia quint da la commensurabladad da las pretensiuns regulatoricas sco quai che la regenza ha adina pretendì.
Il sboz da la OAMR ha ultra da quai in connex cun la garanzia chantunala da las bancas chantunalas. Tenor l'avis da la regenza metta il project da revisiun en dumonda nunnecessariamain l'impurtanza ed ils effects da la garanzia chantunala. La regenza pretenda ch'ina garanzia chantunala explicita vegnia quintada senz'auter e cumplainamain tar las pretensiuns da chapital "gone concern".

Contribuziun chantunala per engrondir l'indriz da far naiv al Rinerhorn
La regenza ha approvà in sustegn finanzial per las Telefericas Rinerhorn SA en il rom da la nova politica regiunala da la confederaziun (NPR) per engrondir l'indriz da far naiv. Ella ha concedì in emprest NPR dad 1 milliun francs. Sco prestaziun d'equivalenza dal chantun Grischun a l'emprest NPR vegn garantida ina contribuziun da 168 339 francs.
Il project cumpiglia la construcziun d'in lai d'accumulaziun d'in cuntegn da 20 000 meters cubic en il sectur da la staziun da val Nülli. Quest lai vegn ad esser utilisabel er durant la stad. Supplementarmain duain vegnir ennavads da nov ils territoris dal runal Juonli e da la part sut dal runal Nülli. Cun quest indriz da far naiv po vegnir creada la basa per in manaschi d'enviern prosperaivel en il territori da sport da naiv Rinerhorn. Cun duvrar il lai d'accumulaziun sco planisà er durant la stad resulta ina purschida supplementara. Quai è impurtant per crear valurs turisticas per la destinaziun.

- -
©Bergbahnen Rinerhorn AG/Uffizi federal da topografia

Gremi: regenza
Funtauna: rg chanzlia chantunala dal Grischun
Neuer Artikel