Navigation

Inhaltsbereich

Il cusseglier guvernativ Christian Rathgeb scuntra il schef da l'armada

  • Erste Mitteilung
  • Neuen Beitrag einfügen
Dacurt ha il cusseglier guvernativ Christian Rathgeb retschavì il schef da l'armada, cumandant da corp Philippe Rebord, e ses viceschef dal stab, colonel en il stab general Markus Rihs, ad in discurs da lavur a Haldenstein.

La visita da lavur ha servì a tgirar ils contacts. Il schef da l'armada è responsabel per il svilup e per la direcziun da l'armada ed è suttamess directamain al schef dal departament federal da defensiun, protecziun da la populaziun e sport (DDPS), cusseglier federal Guy Parmelin.

La collavuraziun dal chantun Grischun cun l'armada è stretga e multifara. En il rom da questa scuntrada impurtanta èn vegnids discutads detagliadamain differents temas sco la preschientscha da l'armada en il chantun Grischun ed il dumogn cuminaivel d'eveniments extraordinaris ed èn vegnids depositads giavischs vicendaivels. En quest connex ha il cusseglier guvernativ Christian Rathgeb punctuà l'impurtanza da l'armada per il chantun Grischun ed ha renvià al model directiv militar dal chantun Grischun. Tuttas duas varts èn stadas d'accord che la collavuraziun vivida oz saja sa cumprovada fitg. La collavuraziun fitg buna en tut ils secturs e la communicaziun averta èn vegnidas ludadas dals participants.

Fotografia agiuntada:
-
Da sanestra: Regula Hunger, secretaria dal departament; Markus Rihs, schef affars politics e militars defensiun / substitut schef dal stab schef da l'armada; Christian Rathgeb, cusseglier guvernativ; Philippe Rebord, schef da l'armada; Martin Bühler, manader da l'uffizi da militar e da protecziun civila


Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad
Neuer Artikel