Navigation

Inhaltsbereich

Verificaziun dal scrutini per las elecziuns da la regenza

  • Erste Mitteilung
  • Neuen Beitrag einfügen
Per las elecziuns da la regenza che han gì lieu dumengia, ils 10 da zercladur 2018, sto vegnir fatga d'uffizi ina verificaziun dal scrutini pervia da la differenza da vuschs tranter ils dus candidats Jon Domenic Parolini e Walter Schlegel. La regenza ha ordinà ina verificaziun dal scrutini.

Tenor la lescha davart ils dretgs politics en il chantun Grischun sto il resultat total provisoric eruì a chaschun d'ina elecziun vegnir verifitgà d'uffizi, sche la differenza da las vuschs tranter l'ultima persuna elegida e l'emprima persuna betg elegida è pli pitschna che 0,3 pertschient dals cedels electorals valaivels consegnads.

La dumengia d'elecziun, ils 10 da zercladur 2018, ha la chanzlia chantunala dal Grischun pudì publitgar il suandant resultat total provisoric: cedels electorals valaivels consegnads 46 432, vuschs per Jon Domenic Parolini 15 904, vuschs per Walter Schlegel 15 836. La differenza da las vuschs importa 68 vuschs, pia main che 0,3 pertschient dals cedels electorals valaivels consegnads (0,3 pertschient da 46 432 = 139,296). Er sin fundament dals protocols en scrit da las vischnancas ch'èn arrivads en il fratemp tar la chanzlia chantunala, resta la differenza da las vuschs pli pitschna che 0,3 pertschient. Uschia sto il scrutini, sco prescrit da la lescha, vegnir verifitgà d'uffizi.

En recusaziun da cusseglier guvernativ Jon Domenic Parolini ha la regenza incumbensà la chanzlia chantunala da dumbrar anc ina giada las vuschs. Mesemna suentermezdi, ils 13 da zercladur 2018, suenter ch'il material electoral da las vischnancas è entrà, vegni cumenzà cun la verificaziun dal scrutini. Ils dus candidats pertutgads han la pussaivladad d'observar sezs la verificaziun dal scrutini ubain da trametter ina represchentanza. Il resultat vegn publitgà uffizialmain.


Infurmaziuns:
Daniel Spadin, chancelier, chanzlia chantunala dal Grischun, tel. 081 257 22 21, e-mail Daniel.Spadin@staka.gr.ch  


Gremi: regenza
Funtauna: rg chanzlia chantunala
Neuer Artikel