Navigation

Inhaltsbereich

Il chantun Grischun fa tests cun Instagram

  • Erste Mitteilung
  • Neuen Beitrag einfügen
En il rom d'ina emprova da pilot fa il chantun Grischun tests cun Instagram. A partir dad oz produceschan 14 posts da servetsch e partiziuns sco er il servetsch da medias da la chanzlia chantunala, sco "@kantongr", contribuziuns per la rait sociala.

Instagram è in medium social ch'è spezialisà sin crear e sin cundivider maletgs e videos curts. Cun 800 milliuns utilisadras ed utilisaders sin l'entir mund è Instagram actualmain ina da las raits socialas las pli grondas che ha il pli grond success insumma. La differenza principala envers Facebook e Twitter è la concentraziun sin l'aspect visual e sin il public en mira ch'è actualmain giuven. A l'administraziun chantunala sa porscha uschia d'ina vart l'occasiun da transportar infurmaziuns sin in ulteriur plaun da communicaziun e da l'autra vart da cuntanscher er burgaisas e burgais giuvens.

Fasa da test d'in mez onn
L'emprova da pilot dura sis mais e finescha ils 31 da december 2018. A l'emprova sa participeschan l'uffizi da militar e da protecziun civila, l'uffizi per la scola populara ed il sport, l'uffizi da vischnancas, l'uffizi d'energia e da traffic, l'uffizi da guaud e privels da la natira, l'uffizi da construcziun auta, l'uffizi da construcziun bassa, il Plantahof, la polizia chantunala (instrucziun da polizia), il museum d'art dal Grischun, il museum da la natira dal Grischun, il museum retic, la biblioteca chantunala ed il servetsch archeologic.

Cuntegns confurms a la gruppa en mira
La gruppa en mira dad Instagram è actualmain fitg giuvna. Var 40 pertschient da las utilisadras e dals utilisaders èn pli giuvens che 20 onns. Per pudair producir regularmain cuntegns confurms a la gruppa en mira vegnan integrads er collavuraturas e collavuraturs giuvens sco er emprendistas ed emprendists da l'administraziun chantunala en il process da redacziun en il rom da l'emprova da pilot.

Vasta preschientscha en las medias socialas
Cun Instagram s'engrondescha la preschientscha dal chantun Grischun en las medias socialas per in ulteriur chanal. Gia dapi l'onn 2013 vegni infurmà sin Facebook, Twitter e YouTube davart novitads da l'administraziun chantunala, dal cussegl grond e da la regenza.

Glista da tut ils accounts da social media dal chantun Grischun


Infurmaziuns:
Daniel Spadin, chancelier, chanzlia chantunala, tel. 081 257 22 21, e-mail Daniel.Spadin@staka.gr.ch


Gremi: chanzlia chantunala
Funtauna: rg chanzlia chantunala
Neuer Artikel