Zum Seiteninhalt

Bunas enconuschientschas da l'englais als gimnasis grischuns

  • Erste Mitteilung
  • Neuen Beitrag einfügen
En il rom d'ina revisiun parziala da la lescha davart las scolas medias en il chantun Grischun ha il cussegl grond concludì l'avrigl 2008 ina retscha da mesiras per augmentar la qualitad da la scolaziun a las scolas medias grischunas. Ina da questas mesiras è la preparaziun per cuntanscher certificats da lingua confurms al stgalim. A las scolas autas vegnan premessas oz per la gronda part dals studis – il pli tard en il studi da master – enconuschientschas fitg bunas da l'englais.

L'ultim onn da la scolaziun al gimnasi vegni perquai prendì en mira en il rom englais d'acquistar in certificat da lingua extern sin nivel C1 tenor la Norma europeica communabla per las linguas (NEC). Dapi l'onn da scola 2014/15 absolvan tut las scolaras e tut ils scolars da las classas finalas dals gimnasis grischuns obligatoricamain in examen da certificat extern correspundent en englais. Il resultat cuntanschì vegn resguardà en la nota da l'attest da semester dal rom englais. Pervia da la durada pli lunga da la scolaziun èn ils examens dal certificat da linguas vegnì introducì in onn pli tard al gimnasi da la Fundaziun per il gimnasi da sport da Tavau.

Cleramain dapli scolaras e scolars sin il nivel C1
En l'emprim onn da la realisaziun han gia la mesadad da tut las scolaras e da tut ils scolars che han fatg l'examen cuntanschì in certificat da lingua dal nivel C1. Sin basa da las datas ch'èn avant maun da l'onn da scola 2017/18 èn quai en il fratemp schizunt var 70 pertschient en tut il chantun. Da quellas scolaras e da quels scolars che n'han betg cuntanschì in certificat da lingua dal nivel C1, ha ina gronda part cuntanschì cun success il nivel B2. La statistica da l'onn da scola 2017/18 è vegnida fatga senza ils resultats da las scolaras e dals scolars da la Fundaziun per il gimnasi da sport da Tavau, perquai che quellas valurs da cumparegliaziun vegnan ad esser avant maun pir il proxim onn da scola pervia dal temp da scolaziun ch'è in onn pli lung.

La quota da success sa meglierescha onn per onn
Da las datas ch'èn fin ussa avant maun po vegnir observada ina tendenza positiva. Tut en tut è la quota da success sa meglierada onn per onn dapi l'introducziun da l'obligatori. Er sche l'instrucziun d'englais al gimnasi cuntegna – ultra da las enconuschientschas linguisticas pretendidas per l'examen da certificat – ulteriuras finamiras d'instrucziun, conferman ils resultats legraivels dal certificat che las mesiras prendidas en reguard ad in access general al studi sviluppan in effect positiv.


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail Martin.Jaeger@ekud.gr.ch
- dr. Hans Peter Märchy, manader da l'uffizi per la furmaziun media-superiura, tel. 081 257 61 65, e-mail Hans.Peter.Maerchy@ahb.gr.ch


Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient
Neuer Artikel