Navigation

Inhaltsbereich

Plan directiv chantunal: adattaziuns en ils secturs dals spazis da viver per la selvaschina e da las auas da surfatscha

  • Erste Mitteilung
  • Neuen Beitrag einfügen
Ils chapitels existents "Spazis da viver per la selvaschina e chatscha" sco er "Auas da surfatscha e pestga" dal plan directiv chantunal vegnan repassads cumplettamain. Durant l'exposiziun publica dals 22 d'avust fin ils 21 da settember 2018 po mintgin prender posiziun davart quest project.

La revisiun dals chapitels "Spazis da viver per la selvaschina e chatscha" sco er "Auas da surfatscha e pestga" è daventada necessaria, perquai ch'i ha dà novas disposiziuns legalas sin plaun federal sco er perquai ch'ina meglra basa è avant maun.

Preschentà ils spazis da viver per la selvaschina e chatscha a maun da trais chapitels parzials
Il chapitel "Spazis da viver per la selvaschina e chatscha" vegn repassà cumplettamain e structurà da nov en trais parts. L'emprima part "Selvaschina, animals da rapina gronds e chatscha" preschenta la strategia dal tractament d'animals selvadis e mussa lur basegns envers il spazi. Cun mesiras da la protecziun da selvaschina e da la chatscha vegnan prendids en mira effectivs da selvaschina ch'èn repartids en moda natirala ed adattads al spazi da viver. Plinavant vegni mussà, co che las cumpetenzas da las autoritads èn regladas en quai che concerna ils asils da selvaschina ed ils territoris scumandads per la chatscha.

Durant l'enviern dovran ils animals selvadis refugis, nua ch'els na vegnan betg disturbads. Cun la segunda part "Zonas da paus per la selvaschina" vegn stgaffida ina basa, sin la quala las vischnancas pon sa basar, sch'i sa tracta da determinar quests refugis en la planisaziun locala.

La terza part "Corridors da selvaschina" tracta las rutas fixas che vegnan duvradas d'animals selvadis e che collian populaziuns entaifer l'areal da derasaziun d'ina spezia. Igl è impurtant ch'ils corridors da selvaschina na sajan betg interruts, per ch'il barat genetic possia avair lieu entaifer las spezias dals animals selvadis. La concepziun dals corridors – en spezial en passaschas neuralgicas – per exempel cun punts per la selvaschina è er impurtanta per la segirezza dal traffic. Tenor la statistica dals accidents da traffic furman en il chantun Grischun ils accidents cun selvaschina la part la pli gronda en la gruppa dals tips d'accident. Cun ina coordinaziun ad ura duain vegnir pussibilitads il mantegniment e, sche necessari, il meglierament dals corridors ed uschia da la permeabilitad da la cuntrada. En il rapport explicativ vegnan mussads mintgamai il stadi sco er las pussaivladads d'agir tar mintga singul corridor da selvaschina.

Adattaziun a la lescha federala en il sectur da las auas da surfatscha e da la pestga
L'onn 2011 è entrada en vigur la revisiun da la lescha federala davart la protecziun da las auas (LPAuas) sco er la revisiun da l'ordinaziun federala davart la protecziun da las auas (OPAuas). La lescha incumbensescha ils chantuns e las vischnancas da cunfinar il spazi da las auas uschia che las funcziuns natiralas da las auas sco er la protecziun cunter aua gronda èn garantidas e ch'i resta plazza per utilisar las auas. Quest basegn da spazi che sto vegnir segirà a lunga vista, vegn designà sco "spazi d'auas". La lescha incumbensescha ils chantuns da realisar quests puncts fin la fin da l'onn 2018. En il chapitel repassà dal plan directiv èsi fixà tranter auter, tenor tge metoda ch'ils spazis d'auas ston vegnir zavrads e determinads. La determinaziun sco tala dals spazis d'auas en la planisaziun locala vegn fatga da las vischnancas. Tras l'adattaziun dal plan directiv chantunal ademplescha il Grischun l'incumbensa legala sin il stgalim da la planisaziun directiva.

Las adattaziuns dal plan directiv chantunal èn exponidas publicamain dals 22 d'avust fin ils 21 da settember 2018. Durant quest temp po mintgin prender posiziun davart quest project. Vischnancas che han corridors da selvaschina sin lur territori vegnan adressadas directamain e vegnan supplitgadas da prender posiziun. Ils documents chattan ins er en l'internet sut www.are.gr.ch / Rumantsch / Actualitads.


Infurmaziuns:
- Richard Atzmüller, manader da l'uffizi per il svilup dal territori, tel. 081 257 23 21, e-mail Richard.Atzmueller@are.gr.ch
- dr. Jacques Feiner, manader da la partiziun "planisaziun directiva e basas", tel. 081 257 23 37, e-mail Jacques.Feiner@are.gr.ch


Gremi: uffizi per il svilup dal territori
Funtauna: rg uffizi per il svilup dal territori
Neuer Artikel