Zum Seiteninhalt

Project fiscal 17: Il departament da finanzas preschenta la realisaziun concreta

Il sboz per la revisiun parziala da la lescha chantunala da taglia e da la lescha davart las taglias communalas e davart las taglias da baselgia va en consultaziun. Cun questa revisiun parziala duai vegnir realisà il project fiscal 17 sin plaun chantunal.

Ils 12 da favrer 2017 han il pievel ed ils chantuns refusà la refurma da l'imposiziun da taglia sin interpresas III (RTI III). Cun quest na dal suveran è s'augmentà il squitsch da remplazzar las societads da domicil, las societads da holding e las societads maschadadas, q.v.d. las uschenumnadas societads cun status spezial, che n'èn betg pli acceptadas sin plaun internaziunal e che vegnan suttamessas a la taglia en moda privilegiada. Il cussegl federal ha preschentà svelt in nov project numnà Project fiscal 17 (PF17). Cun quest project èn vegnids surpigliads ils tratgs essenzials da l'anteriura RTI III, singulas mesiras èn vegnidas stritgadas ed auters elements èn vegnids agiuntads. Il cussegl dals chantuns ha tractà il project durant la sessiun da stad e l'ha cumplettà cun ina part per la finanziaziun da la AVS.

Il PF17 è en in emprim pass in project da la confederaziun, cun il qual vegnan midadas la lescha federala davart la taglia federala directa (LTFD) e la lescha federala davart l'armonisaziun da la taglia directa dals chantuns e da las vischnancas (LATD). La LATD è ina lescha generala che cuntegna disposiziuns obligatoricas per ils chantuns, ch'il legislatur chantunal sto – en in segund pass – realisar en sia lescha da taglia. Quai vegn fatg cun la revisiun parziala qua avant maun.

Las midadas las pli impurtantas
L'aboliziun dals privilegis fiscals per las societads cun status spezial vegn a chaschunar en numerus chantuns ina reducziun vesaivla da las tariffas da la taglia sin il gudogn. Per restar cumpetitiv er en il futur, propona il departament da finanzas perquai da reducir la tariffa da taglia dad actualmain 5,5 pertschient a da nov 4 pertschient.

La reducziun da la tariffa chantunala da taglia da las persunas giuridicas ha er consequenzas per las vischnancas. Per las vischnancas incassescha il chantun oz ina taglia sin il gudogn e sin il chapital cun in pe da taglia unitar. Per impedir che las vischnancas stoppian prender en cumpra minus d'entradas massivs en connex cun la taglia sin il gudogn, duain ellas survegnir la pussaivladad da pudair fixar independentamain il pe da taglia entaifer ina tscherta dimensiun. Uschia pon las vischnancas cumpensar la reducziun da la tariffa da la taglia sin il gudogn cun in augment dal pe da taglia.

Las distribuziuns dal gudogn da las persunas giuridicas ad in pajataglia cun ina participaziun d'almain 10 pertschient, vegnan – en il dretg vertent – suttamessas a la taglia federala e chantunala a 60 pertschient (dretgs da participaziun èn facultad privata) respectivamain a 50 pertschient (dretgs da participaziun èn facultad da fatschenta). Cun questa imposiziun parziala da taglia duain ils gudogns che vegnan obtegnids en ina societad anonima e che vegnan pajads ora a l'acziunari, esser suttamess ad ina grevezza fiscala sumeglianta sco ils gudogns obtegnids en ina interpresa da persunas. Pervia da la reducziun da la tariffa da la taglia sin il gudogn da 5,5 pertschient a 4 pertschient, s'impona ina imposiziun parziala da taglia da 70 pertschient. Questa soluziun correspunda er a quella da la taglia federala directa.

Per entradas ord patentas prevesa la lescha d'armonisaziun da taglia ina imposiziun da taglia reducida. La reducziun dastga importar maximalmain 90 pertschient. Perquai che talas entradas n'han nagina impurtanza centrala en il chantun, vegn proponida mo ina reducziun da 70 pertschient.

Consequenzas finanzialas
Las consequenzas finanzialas dal PF17 per il chantun sa cumponan dals trais suandants facturs: la reducziun dals pajaments ord la gulivaziun da las resursas da la confederaziun, las entradas supplementaras ord la part pli auta da la taglia federala directa sco er las mesiras fiscalas dal chantun. Tut en tut resultan minus d'entradas stimads da circa 21,5 milliuns francs. Quest import correspunda a 3 pertschient da tut ils retgavs da taglia dal chantun.

Sin plaun da las vischnancas sa fa valair la reducziun da la tariffa da la taglia sin il gudogn il pli fitg. Perquai che la cumpetitivitad fiscala n'ha betg la medema impurtanza per tut las vischnancas, survegnan quellas da nov la pussaivladad da fixar independentamain il pe da taglia entaifer ina tscherta dimensiun per la taglia sin il gudogn e sin il chapital.

Plan da termins

Il plan da termins da la procedura chantunala da legislaziun dependa da las debattas parlamentaras davart il PF17 en l'assamblea federala. Actualmain èsi planisà ch'il PF17 vegnia deliberà durant la proxima sessiun d'atun. En il chantun èsi previs da tractar il project en il cussegl grond durant la sessiun d'avust 2019, uschia ch'igl è pussaivel d'al metter en vigur per il 1. da schaner 2020.

La consultaziun dura fin la fin da november 2018. Ils documents en chaussa pon vegnir consultads en l'internet sut il link: https://www.gr.ch/DE/publikationen/vernehmlassungen/Seiten/Laufende.aspx.


Infurmaziuns:

- cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail Barbara.Janom@dfg.gr.ch
- Urs Hartmann, schef da l'administraziun da taglia, tel. 081 257 33 24, e-mail Urs.Hartmann@stv.gr.ch


Gremi: departament da finanzas e vischnancas
Funtauna: rg departament da finanzas e vischnancas