Sut il motto "I pertutga nus tuts" han lieu dals 6 da settember fin ils 10 d'october 2018 – en collavuraziun cun radund 35 partenaris – ils 3. dis d'acziun grischuns per la sanadad psichica. En l'entir chantun vegnan salvadas 34  ccurrenzas che vulan infurmar, sclerir e rumper tabus.

Malsognas psichicas appartegnan, precis sco malsognas corporalas, tar la vita e pon tutgar mintgina e mintgin. Circa mintga segunda fin terza persuna è pertutgada durant sia vita d'ina greva malsogna psichica. La stigmatisaziun sociala da malsognas psichicas ha però adina per consequenza che mo la mesadad da las persunas pertutgadas fa diever d'agid professiunal. Tant pli impurtant èsi da rumper tabus.
Ensemen cun radund 35 partenaris va l'uffizi da sanadad dal Grischun cun il tema "Sanadad psichica" en la publicitad. Ils dis d'acziun "I pertutga nus tuts" cun 34 occurrenzas envidan la populaziun a vegnir a savair, co ch'ins mantegna la sanadad psichica e co ch'ins fa frunt a squitschs ed a crisas. Ils temas cumpiglian "Viver bain cun demenza", "Curs intensiv per babs" fin "Queeren Living Library", en la quala ins po tadlar istorgias da giuvenils omosexuals.

Vernissascha "Vias or da la depressiun"
Ils dis d'acziun cumenzan ils 6 da settember cun ina vernissascha. En la concurrenza creativa "Vias or da la depressiun" eran vegnidas envidadas persunas pertutgadas ed anteriuramain pertutgadas da preschentar en moda creativa lur via or da la depressiun. Da 47 ovras entradas ha ina giuria d'experts tschernì 26. Las ovras fan pensar, commovan, ma dattan er forza e fan curaschi. L'exposiziun dura fin ils 26 da settember sin la plazza dal teater, Cuira. L'entrada è gratuita.

Agiuntas:
Carnet da program "Dis d'acziun per la sanadad psichica" 2018
Fegl sgulant tar l'exposiziun "Vias or da la depressiun"


Infurmaziuns:
Denise Rudin, uffizi da sanadad, manadra da partiziun, tel. 081 257 64 08, e-mail Denise.Rudin@san.gr.ch  


Gremi: uffizi da sanadad
Funtauna: rg uffizi da sanadad