Sin invit da la regenza grischuna ha la regenza dal chantun Friburg visità ier ed oz il chantun Grischun.

Al timun da la visita da la delegaziun da Friburg en il chantun Grischun è stà il president da la regenza Georges Godel. El è vegnì accumpagnà dal vicepresident da la regenza Jean-Pierre Siggen, da la cussegliera guvernativa Anne-Claude Demierre e dals cussegliers guvernativs Maurice Ropraz, Jean-François Steiert, Olivier Curty e Didier Castella sco er da la chanceliera Danielle Gagnaux-Morel.

Ils giasts èn vegnids retschavids ier en la Chasa grischa a Cuira. La saira han gì lieu ina tura guidada tras la citad ed ina visita da la catedrala. Oz en damaun èn las delegaziuns viagiadas a Trun ed han visità il museum "Cuort Ligia Grischa". Per il suentermezdi è stada planisada in'excursiun a Conn tar la plattafurma panoramica "Il Spir", che porscha ina vista unica da 180 grads sin la chavorgia da la Ruinaulta.

La visita da la regenza dal chantun Friburg serva en emprima lingia a tgirar las relaziuns amicablas ed a barattar experientschas sin ils champs da la cultura, da l'economia e da la politica.

Fotografias agiuntadas:

La delegaziun grischuna e friburgaisa cun ils presidents da la regenza Georges Godel e Mario Cavigelli (amez).

Gremi: regenza
Funtauna: rg chanzlia chantunala dal Grischun