Navigation

Inhaltsbereich

  • Erste Mitteilung
  • Neuen Beitrag einfügen
Suenter la midada da l'aura la fin d'emna passada cun precipitaziuns per part intensivas e cun naiv fin giu en regiuns bassas po il scumond absolut da far fieu en il guaud ed en la vischinanza dal guaud, ch'era vegnì pronunzià ils 11 da fanadur 2018, vegnir abolì en tut las regiuns ch'èn anc pertutgadas dal scumond. Ils proxims dis èsi danovamain da quintar cun precipitaziuns. Per il nord da las Alps èn dentant er prognostitgadas fasas meteorologicas chaudas cun ferm favugn, uschia ch'ins sto er vinavant esser fitg precaut, sch'ins fa fieu al liber.

Tenor MeteoSvizra han ins registrà en Svizra la quart chauda primavaira e la terz chauda stad dapi il cumenzament da las mesiraziuns l'onn 1864. Cunzunt las quantitads da precipitaziuns èn restadas en la gronda part da la Svizra cleramain sut la media da blers onns. Uschia han mo las stads dals onns 1983, 1984 e 2015 gì pli paucas precipitaziuns. Perquai èsi stà inevitabel da pronunziar per bunamain tut las regiuns dal Grischun in scumond absolut da far fieu en il guaud ed en la vischinanza dal guaud e da tegnair en vigur quest scumond en tscherts territoris durant in lung temp.

Nagins gronds incendis da guaud en il Grischun
Bleras vischnancas han extendì il scumond da far fieu er sin territoris ordaifer il guaud. Grazia a questas mesiras e grazia al fatg che la populaziun ha observà fitg bain il scumond da far fieu, han ils pumpiers stuì stizzar mo singuls incendis ch'eran per il solit pitschens. D'eveniments gronds è il chantun per fortuna restà preservà. L'uffizi da guaud e privels da la natira sco er l'assicuranza d'edifizis cun la partiziun "pumpiers" engrazian a la populaziun ed a las vischnancas d'avair prendì resguard e d'avair tractà nossa cuntrada natirala e cultivada cun quità.

Precauziun è dumandada er vinavant
Malgrà che la situaziun sa calma, n'è il terren anc betg provedì dapertut cun aua avunda. La setgira ha numnadamain durà memia ditg. Cunzunt durant fasas da favugn vegn il privel d'incendis da guaud puspè a crescher svelt. Perquai ston ins er vinavant esser fitg precaut, sch'ins fa fieu al liber. Per grillar en il guaud ed en la vischinanza dal guaud dastgan vegnir duvrads mo fuclars betunads. Il fuclar sto vegnir observà permanentamain e dastga vegnir bandunà pir, cur ch'il fieu è stizzà dal tuttafatg. En fuclars selvadis e sin terren luc èsi er vinavant scumandà da far fieu. Plinavant èsi da desister da far fieu, sch'i cumenzan vents ferms. Products da fimar e battafieus na dastgan en nagin cas vegnir bittads davent senza quità.


Ulteriuras infurmaziuns e valitaziun da la situaziun actuala


Infurmaziuns:
Andrea Kaltenbrunner, uffizi da guaud e privels da la natira, tel. 081 257 38 68, e-mail Andrea.Kaltenbrunner@awn.gr.ch


Gremi: uffizi da guaud e privels da la natira
Funtauna: rg uffizi da guaud e privels da la natira
Neuer Artikel