Navigation

Inhaltsbereich

  • Erste Mitteilung
  • Neuen Beitrag einfügen

Giuvenils ston sa decider baud en tge direcziun che lur vita duai ir. La purschida da professiuns è però fitg gronda. In agid dat FIUTSCHER: l'exposiziun professiunala grischuna per la furmaziun fundamentala ed il perfecziunament professiunal permetta in sguard cumplessiv en il mund da lavur. Er il chantun Grischun è preschent en la halla da la citad da Cuira fin dumengia, ils 18 da november 2018. Ina seria da videos mussa la diversitad da las plazzas d'emprendissadi da l'administraziun chantunala.

Gia per la tschintgavla giada avra l'exposiziun professiunala grischuna per la furmaziun fundamentala ed il perfecziunament professiunal FIUTSCHER sias portas. Da mesemna, ils 14, fin dumengia, ils 18 da november 2018, vegnan preschentadas quest onn passa 300 professiuns e purschidas da furmaziun supplementara a numerus stans en la halla da la citad da Cuira. Divers stans porschan er ina invista da la diversitad da las professiuns tar l'administraziun chantunala sco er dals centers da furmaziun dal chantun.

Al stan nr. 306 (halla da la citad da Cuira, plaun sura) èn represchentads l'administraziun chantunala dal Grischun ensemen cun l'administraziun communala sco er cun l'uffizi dal register funsil. Quest nov stan dat ina survista da la ritga paletta d'emprendissadis ch'ins po far tar l'administraziun publica. Davart intgins emprendissadis da l'administraziun chantunala pon ins guardar videos e davart auters survegnan ins infurmaziuns impurtantas al stan. Las emprendistas ed ils emprendists sco er las furmaturas ed ils furmaturs da la professiun As infurmeschan gugent al lieu davart ils emprendissadis tar l'administraziun publica.

Er quest onn vegnan puspè spetgads millis scolaras e scolars e persunas d'instrucziun dal stgalim superiur da tut las regiuns dal Grischun. L'ultima exposiziun FIUTSCHER da l'onn 2016 è vegnida serrada suenter che 13 000 visitadras e visitaders l'avevan frequentada.


Infurmaziuns:
Raffaella Bacchi, responsabla per la furmaziun professiunala tar l'uffizi da persunal dal Grischun, tel. 081 257 32 38, e-mail Raffaella.Bacchi@pa.gr.ch  


Gremi: uffizi da persunal
Funtauna: rg uffizi da persunal

 

 

Neuer Artikel

Emprendissadi tar il chantun Grischun