Navigation

Inhaltsbereich

  • Erste Mitteilung
  • Neuen Beitrag einfügen
La regenza ha concedì ina contribuziun per l'instituziun Polo Poschiavo ed ha prendì enconuschientscha dal project federal per la votaziun dal pievel dals 10 da favrer 2019.

La regenza deliberescha ina contribuziun per l'instituziun Polo Poschiavo
L'instituziun Polo Poschiavo survegn ina contribuziun chantunala annuala da 200 000 francs per ils onns 2019-2020. L'essenza da Polo Poschiavo è in center da cumpetenza per la furmaziun supplementara e per l'accumpagnament da projects da svilup. Polo Poschiavo porscha a la populaziun in access a tecnologias novas sco per exempel e-learning e meglierescha uschia la cumpetitivitad da tut la regiun. Il sustegn finanzial duai servir oravant tut a la furmaziun supplementara professiunala da persunas che abitan e che lavuran en il Grischun.

Projects da votaziun dals 10 da favrer 2019
La regenza ha prendì enconuschientscha dal fatg ch'il suandant project federal vegn suttamess a la votaziun dal pievel la dumengia, ils 10 da favrer 2019:

- Iniziativa dal pievel dals 21 d'october 2016 "Franar la construcziun dischordinada – per in svilup durabel dals abitadis (Iniziativa cunter la construcziun dischordinada)".

Sin plaun chantunal n'èn nagins projects madirs per la votaziun dals 10 da favrer 2019.


Gremi: regenza
Funtauna: rg chanzlia chantunala dal Grischun
Neuer Artikel