Navigation

Inhaltsbereich

Glisch verda per il plan per il svilup dal guaud 2018+

  • Erste Mitteilung
  • Neuen Beitrag einfügen
La regenza ha approvà ils 13 da november 2018 il plan per il svilup dal guaud (PSG) 2018+. Cun il PSG 2018+ stat a disposiziun al servetsch forestal, ma er a las ulteriuras autoritads chantunalas e communalas, ina planisaziun che s'orientescha als resultats e che serva ad exequir las sfidas multifaras en la cultivaziun dal guaud.

Circa in terz dal chantun Grischun è cuvert cun guaud. Pervia da las differentas funcziuns dal guaud ed en consequenza dals basegns augmentads da la societad resultan pretensiuns pli grondas e pli cumplexas envers la cultivaziun dal guaud. Il PSG 2018+ fixescha las strategias per pudair dumagnar questas sfidas, per coordinar ils basegns in cun l'auter e per schliar eventuals conflicts.

Il PSG 2018+ è vegnì elavurà sut la direcziun da l'uffizi da guaud e privels da la natira ed en stretga collavuraziun cun las vischnancas, cun ils uffizis chantunals pertutgads e cun las gruppas d'interess las pli impurtantas. Uschia èsi garantì che la gronda part dals interess per il guaud ha pudì vegnir resguardada en la planisaziun.

Il PSG 2018+ resguarda particularitads regiunalas
Il nov PSG è concepì specificamain per las tschintg regiuns forestalas Signuradi / Partenz / Tavau, Val dal Rain / Scanvetg, Surselva, Grischun central / Moesano e Grischun dal sid. Il PSG cuntegna princips generals che valan per l'entir chantun. Plinavant vegnan dentant er resguardadas las particularitads da las singulas regiuns. En mintga PSG regiunal vegnan tractads sin set fegls d'object ils temas "guaud da protecziun", "explotaziun da laina", "natira e cuntrada", "guaud pasculà", "recreaziun e turissem", "guaud – selvaschina – chatscha" ed "avertura".

Ils champs d'acziun ils pli impurtants da la cultivaziun dal guaud èn en il futur l'occupaziun cun la midada dal clima, la tgira da la surfatscha necessaria dal guaud da protecziun, la garanzia da la regiuvinaziun necessaria dal guaud e la finanziaziun da las prestaziuns publicas dal guaud.

Ils documents da planisaziun e las chartas appartegnentas pon vegnir consultads publicamain sut www.wep.gr.ch.


Infurmaziuns:
- president da la regenza dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch
- Reto Hefti, selvicultur chantunal, uffizi da guaud e privels da la natira, tel. 081 257 38 51, e-mail Reto.Hefti@awn.gr.ch


Gremi: departament da construcziun, traffic e selvicultura
Funtauna: rg departament da construcziun, traffic e selvicultura
Neuer Artikel