Navigation

Inhaltsbereich

  • Erste Mitteilung
  • Neuen Beitrag einfügen
La regenza ha concedì var 2 milliuns francs per in project da construcziun da la scola-dimora Cuira ed ha approvà in project da protecziun cunter lavinas a Samignun.

Contribuziuns da construcziun per la sanaziun totala da la scola-dimora Cuira
La regenza ha approvà ina dumonda da la fundaziun scola-dimora Cuira per contribuziuns da construcziun. Il project cumpiglia l'emprima fasa da la sanaziun totala da la tecnica da chasa sco er la sanaziun da la cuschina dal manaschi. La basa da finanziaziun per quest project da construcziun furman la lescha da scola sco er la lescha d'integraziun da persunas cun impediments. La contribuziun da construcziun da var 2 milliuns francs vegn dentant garantida pir suenter l'approvaziun da la dumonda per la segunda fasa.
La sanaziun totala da las installaziuns da la tecnica da chasa prevesa tranter auter da colliar il stgaudament cun ina rait da chalur a distanza, da renovar l'entira repartiziun d'aua chauda e fraida sco er ils indrizs per far aua chauda e da remplazzar la cuschina dal manaschi.

-
©Scola-dimora Cuira

Approvà in project da protecziun cunter lavinas da la vischnanca da Samignun
La regenza ha dà glisch verda ad in project da protecziun cunter lavinas da la vischnanca da Samignun ed ha concedì ina contribuziun chantunala da var 371 000 francs per quest project. Previsa è la construcziun d'in rempar da deviaziun d'ina lunghezza da circa 55 meters. Quel duai proteger cunter lavinas il quartier ch'è situà sutvart e che tutga tar la fracziun Ravaisch.
Ils ultims 100 onns èn vegnidas giu quatter lavinas fin tar las chasas. Dapi bundant 30 onns vegn segirà il territori d'abitadi cun agid da siglientadas da lavinas. L'emprim vegnivan applitgads bittaminas e pli tard indrizs fixs per siglientar lavinas. Questa metoda da segiranza cuntegna però ina tscherta malsegirezza en il sectur tecnic ed uman. Uschia po il sistem disdir tecnicamain u l'uman po far faussas valitaziuns. Tut en tut profita passa ina dunsaina edifizis da l'effect da protecziun dal nov rempar da deviaziun da lavinas, tranter quels er in hotel.

-
©Uffizi federal da topografia


Gremi: regenza
Funtauna: rg chanzlia chantunala dal Grischun
Neuer Artikel