La confederaziun ed ils chantuns han lantschà cuminaivlamain l'app "VoteInfo". Ella preschenta a las dumengias da votaziun a partir da las 12.00 permanentamain resultats actualisads da las votaziuns naziunalas e chantunalas. Cun l'app survegnan las votantas ed ils votants svizzers in nov access mobil a las infurmaziuns uffizialas davart las votaziuns federalas e chantunalas. Sin lur smartphone chattan ellas ed els – ultra dals resultats da las votaziuns – er explicaziuns tar tut ils projects naziunals e chantunals. "VoteInfo" è online a partir d'immediat e cuntegna las explicaziuns tar la votaziun dals 10 da favrer 2019.

Pudair leger sin il smartphone tut las infurmaziuns davart las votaziuns en moda concentrada: quai è la finamira da "VoteInfo" – l'app che la confederaziun ed ils chantuns han creà cuminaivlamain. Per l'emprima giada stattan uschia a disposiziun sin ina plattafurma explicaziuns e resultats per tut las votaziuns naziunalas e chantunalas. Al di da votaziun vegnan publitgads a partir da las 12.00 resultats intermediars che vegnan actualisads permanentamain fin ch'ils resultats finals èn avant maun. Ultra da quai pon vegnir consultads cun l'app er videos explicativs tar ils projects ed in archiv.

Mobil, persunalisà ed activ
Ultra da l'access mobil e concentrà a tut las infurmaziuns uffizialas davart las votaziuns federalas e chantunalas porscha "VoteInfo" a las votantas ed als votants la pussaivladad d'endrizzar las explicaziuns ed ils resultats or dals chantuns sco favurits tenor interess persunals. Las utilisadras ed ils utilisaders pon abunar messadis push. Quellas rendan attent a novas infos, a videos u a resultats finals. Las votantas ed ils votants pon er laschar sa regurdar ch'els possian anc ir a votar.

Resultats sco open-government-data
Cun lantschar l'app han la confederaziun ed ils chantuns er concepì da nov en reguard tecnic ed organisatoric la transmissiun dals resultats e l'eruida dals resultats provisorics da las votaziuns. Tut ils resultats vegnan publitgads permanentamain a partir da las 12.00 sin www.opendata.swiss sco open-government-data. Els stattan directamain a disposiziun a las medias ed a la publicitad sco datas legiblas da maschinas.

La Confederaziun ed ils chantuns vulan extender "VoteInfo" pass per pass. En l'app pon vegnir consultads ils resultats da las votaziuns federalas e chantunalas gia fin sin plaun communal. Percunter n'èn anc avant maun naginas infurmaziuns tar projects communals. La finamira da "VoteInfo" è quella che las votantas ed ils votants pon chattar er questas infurmaziuns en l'app.

"VoteInfo" datti per iOS e per Android
La chanzlia federala ha sviluppà l'app "VoteInfo" cun agid da l'uffizi federal da statistica UST ed en stretga collavuraziun cun il chantun Turitg. La nova app datti per iOS sco er per Android. Ella po vegnir chargiada giu gratuitamain dal App Store e da Google Play.

Android: https://play.google.com/store/apps/details?id=ch.bk.voteinfo  
iOS: https://itunes.apple.com/ch/app/id1434819062  


Persuna dal chantun Grischun che dat infurmaziuns
Daniel Spadin, chancelier, tel. 081 257 22 21, e-mail Daniel.Spadin@staka.gr.ch  

Persuna da la confederaziun che dat infurmaziuns
René Lenzin, manader da redacziun da las fatschentas quotidianas / vicemanader da la secziun "Communicaziun", tel. 041 58 462 54 93, e-mail rene.lenzin@bk.admin.ch  


Gremi: chanzlia chantunala / chanzlia federala ChF, secziun "Communicaziun"
Funtauna: rm chanzlia chantunala / chanzlia federala ChF, secziun "Communicaziun"