Zum Seiteninhalt

La cumissiun dal cussegl grond per economia e taxas sustegna la midada dal dretg fiscal

La cumissiun dal cussegl grond per economia e taxas ha predeliberà la missiva da la regenza tar la revisiun parziala da la lescha chantunala da taglia sco er da la lescha davart las taglias communalas e davart las taglias da baselgia per mauns dal cussegl grond. La cumissiun è entrada unanimamain sin il project. En la discussiun materiala da la fatschenta èn las opiniuns dentant sa differenziadas en puncts essenzials.

Sut il presidi da ses president Reto Loepfe ha la cumissiun dal cussegl grond per economia e taxas predeliberà la missiva da la regenza tar la revisiun parziala da la lescha da taglia per il chantun Grischun sco er da la lescha davart las taglias communalas e davart las taglias da baselgia (taglia sin l'ierta e sin donaziuns). A la sesida èn sa participads er il cusseglier guvernativ Christian Rathgeb, schef dal departament da finanzas e vischnancas, e represchentants da l'administraziun.

En vista a la lescha federala davart la refurma fiscala e la finanziaziun da la AVS (RFFA) ha la minoritad da la cumissiun exprimì tschertas resalvas areguard il mument da questa revisiun parziala ed areguard il minus d'entradas fiscalas che resulta qua tras. Tuttina è la cumissiun entrada unanimamain sin la fatschenta, perquai che la midada da sistem da la taglia sin il relasch a la taglia sin l'ierta vegn considerada da tut ils commembers da la cumissiun sco correcta.

Propostas da midada areguard la liberaziun da taglia ed areguard las tariffas da taglia
Tar il giudicament dal cuntegn èn las opiniuns dentant stadas er vinavant divergentas. D'ina vart hai dà propostas d'extender il circul da las persunas ch'èn liberadas da l'obligaziun da pajar taglia (en spezial sin il tschep dals geniturs). Da l'autra vart èn vegnidas fatgas propostas d'auzar las tariffas da taglia, per uschia mitigiar in pau las perditas da taglia che resultan tras la revisiun parziala actuala. Danovamain èsi vegnì rendì attent ad in'eventuala realisaziun da la RFFA ed ad in ulteriur minus d'entradas fiscalas che resulta qua tras per il chantun e per las vischnancas. Plinavant èn anc vegnidas fatgas in pèr paucas correcturas formalas, e la cumissiun ha fatg la proposta unanima da restrenscher la responsabladad solidarica per la taglia sin l'ierta sin ertavels e legataris cun domicil u cun sedia a l'exteriur.

Il cussegl grond vegn a tractar il project en la sessiun da favrer 2019.


Infurmaziuns:

President da la cumissiun Reto Loepfe, tel. 079 620 09 30


Gremi: cumissiun per economia e taxas
Funtauna: rg cumissiun per economia e taxas